អនុស្សាវរីយ៍៣៤ឆ្នាំ សម្រាប់អានសាកល្បង
បេះដូង
៣៦៥ថ្ងៃរបស់ខ្ញុំ
៣៦៥ថ្ងៃកន្លងមកនេះ ពេលវេលាខ្លះគួរឱ្យខ្លាចណាស់
ម្តងៗខ្ញុំស្មានតែខ្លួនឯងឆ្លងមិនផុតផង។ ខ្ញុំនៅចាំការឈឺចាប់ទាំងនោះ
នៅចាំភាពអស់សង្ឃឹម ហើយក៏ចាំច្បាស់នូវអារម្មណ៍ធ្លាប់យំយែកទួញសោកទាំងនោះ…
វាពិបាកណាស់! ពិបាកដល់គិតថាខ្លួនមិនអាចមកដល់ថ្ងៃនេះបាន។
សករាជថ្មី ខ្ញុំប្រាប់ខ្លួនឯងថា៖ ធ្វើបានហើយណា៎! រឿងពិបាកៗកន្លងមកមានច្រើនណាស់! ហើយខ្ញុំនេះឆ្លងផុតបានទាំងអស់។
ខ្ញុំអង្គុយញញឹមម្នាក់ឯង ហើយសួរខ្លួនឯងទៀតថា៖ ចុះពេលនេះត្រៀមខ្លួនហើយឬនៅ?
រឿងរ៉ាវថ្មីៗនឹងកើតឡើងជាបន្តបន្ទាប់ ខ្ញុំអាចរឹងមាំប្រយុទ្ធបានទៀតទេ?
ពិតជាបាន! ខ្ញុំជឿជាក់! ខ្ញុំរឹងមាំ! ទោះពេលខ្លះខ្ញុំយំ តែខ្ញុំមិនចុះចាញ់!
ព្រោះខ្ញុំដឹងថាភាពរឹងមាំ
ការខំប្រឹងពុះពាររបស់ខ្ញុំតែងផ្តល់លទ្ធផលគាប់ចិត្តដូចរាល់ដង។
៣៦៥ថ្ងៃកន្លងមកជាសាក្សី ទឹកភ្នែកដែលហូរកន្លងមកផ្តល់នូវស្នាមញញឹមរាប់មិនអស់
ផ្តល់ក្តីសង្ឃឹមនិងការរំពឹងដើរទៅមុខនៅលើផ្លូវជីវិតដែលខ្ញុំចង់បាន។
៣៦៥ថ្ងៃទៅមុខ ខ្ញុំត្រៀមខ្លួនរួចហើយ! ខ្ញុំនឹងរឹងមាំដើរឆ្លងបញ្ហាទាំងឡាយដែលនឹងជួប។
ផ្លូវជីវិតមនុស្សម្នាក់ៗ មិនអាចរលូនរហូតឡើយ ផ្លូវជីវិតរបស់អ្នកអាចនឹងមានការផ្លាស់ប្ដូរទៅតាមការចង់បានរបស់អ្នកដទៃ ក៏ព្រោះតែអ្នកទន់ខ្សោយប៉ុណ្ណោះ។
ផ្លូវជីវិតរបស់ខ្ញុំ បានបត់បែនទៅតាមនិស្ស័យ មនោសញ្ចេតនា និងការតាំងចិត្តរបស់ខ្ញុំតែប៉ុណ្ណោះ អត់មាននរណាអាចប្តូផ្លូវដែលខ្ញុំកំពុងដើរក្រៅពីការសម្រេចចិត្តរបស់ខ្ញុំឡើយ។ ខ្ញុំតែងយកឈ្នះហេតុផលរបស់អ្នកដទៃដើម្បីការពារផ្លូវដែលខ្ញុំចង់បន្តដំណើរទៅមុខ។ ខ្ញុំធ្វើបានរាល់ដង ហើយខ្ញុំជឿជាក់ថាខ្ញុំធ្វើបានព្រោះភាពរឹងមាំ ❤️
ជឿទៅ! បើអ្នករឹងមាំ អត់មានអ្នកណាអាចធ្វើការសម្រេចចិត្តលើផ្លូវជីវិតរបស់អ្នកបានទេ!
រឹងមាំណា៎ អ្នកអានជាទីស្រលាញ់! កុំបោះបង់ក្តីស្រមៃរបស់ខ្លួនដើម្បីនរណាឱ្យសោះ!
បងរតនាជូនពរអ្នកអានទាំងអស់ អាចរឹងមាំដើរទៅរកក្តីស្រមៃបានដោយខ្លួនឯង
អត្ថបទអ្នកនិពន្ធរតនា
ការបង្ហាញមតិពីប្អូនស្រី ងិនឆន សុដាលី ក្រោយការអាន “ជាអ្នកធ្វើការ” Book Review
“ជាអ្នកធ្វើការ” គ្រាន់តែបានឃើញចំណងជើងនិងបានដឹងពីខ្លឹមសារខ្លះៗក្នុងសៀវភៅ ខ្ញុំចាប់អារម្មណ៍ចង់ទិញភ្លាមហើយសន្សំលុយដើម្បីកក់សៀវភៅរបស់បងរតនា។ ហេតុផលដែលធ្វើឲខ្ញុំចង់បានសៀវភៅនេះដោយគ្រាន់តែឃើញចំណងជើងនិងមាតិកា ព្រោះត្រូវនឹងបរិយាកាសរស់នៅសព្វថ្ងៃរបស់ខ្ញុំស្រាប់។ ខ្ញុំជានិស្សិតឆ្នាំទី3ហើយធ្វើការក្រៅម៉ោងដែរតែមិនទាក់ទងនឹងជំនាញខ្លួនឯងរៀនទេព្រោះខ្ញុំរៀនជំនាញធនាគារនិងហិរញ្ញវត្ថុ តែខ្ញុំធ្វើការជាអ្នកនិពន្ធប្រលោមលោកទៅវិញ។ ច្រើនដងហើយដែលខ្ញុំចង់បោះបង់ក្ដីស្រម៉ៃខ្លួនឯងព្រោះតែលែងមានទំនុកចិត្តលើសមត្ថភាពខ្លួនឯង គិតថាទៅមិនរួច តែពេលបានអានដល់មាតិកាទី៣”ថយក្រោយដើម្បីទៅមុខ”
ខ្ញុំបានរកឃើញចម្លើយឲខ្លួនឯងថាខ្ញុំមិនបោះបង់ក្ដីស្រម៉ៃខ្លួនឯងហើយក៏នៅតែបន្តសិក្សាជំនាញរៀនរាល់ថ្ងៃ ពោល គឺធ្វើការងារ២ក្នុងពេលតែមួយ ទាំងការងារត្រូវនឹងជំនាញផង ទាំងជាអ្នកនិពន្ធផង។ ធ្វើការងារ២ក្នុងពេលជាមួយគ្នា ថ្វីត្បិតថាហត់មែនតែក៏អាចរកចំណូលបាន ចាត់ទុកថាយោងគ្នាទៅវិញទៅមក។ខ្ញុំធ្លាប់គិតថាបើធ្វើការងារតែមួយមុខ មិនអាចចិញ្ចឹមខ្លួនឯងនិងផ្គត់ផ្គង់គ្រួសារនាថ្ងៃអនាគតបានច្រើនទេ ដូច្នេះហើយទើបខ្ញុំត្រូវប្រើជំនាញនៃការនិពន្ធប្រលោមលោកមកធ្វើពេលទំនេរពីការសិក្សា បើទោះជាវិស័យនេះទទួលបានកម្រៃមកវិញមិនច្រើនតែវាជាអ្វីដែលខ្ញុំចង់ធ្វើ ធ្វើតាមបេះដូងខ្លួនឯងហើយមានអារម្មណ៍ថាមានក្ដីសុខ។ ហេតុនេះហើយ ខ្ញុំសូមណែនាំមិត្តអ្នកអានទាំងអស់គ្នានូវសៀវភៅ”ជាអ្នកធ្វើការ” ចំពោះខ្ញុំ ស្នាដៃរបស់បងរតនាមួយនេះជាចំណេះដឹងបន្ថែមដល់អ្នកអានមិនថាស្ថិតក្នុងស្ថានភាពជានិស្សិតរៀនបណ្ដើរ ធ្វើការបណ្ដើរ មិនថាជាបុគ្គលិកកំពុងបម្រើការងារនៅស្ថាប័ន អ្នកទាំងអស់គ្នានឹងទទួលបានចំណេះដឹងបន្ថែមក៏ដូចជាមេរៀនជីវិតផ្សារភ្ជាប់ជាមួយការងារដើម្បីជាជំនួយដល់ពួកយើងក្នុងគ្រាជួបបញ្ហាជាមួយការងារ សូមអានសៀវភៅមួយក្បាលនេះ ខ្ញុំជឿថាអ្នកនឹងបានរកឃើញដំណោះស្រាយព្រមទាំងគំនិតល្អៗជាមិនខាន។
ការបង្ហាញមតិពីប្អូនស្រីមិថុនាក្រោយការអាន “ជាអ្នកធ្វើការ” Book Review
សៀវភៅបែបទស្សនះមួយក្បាលនេះអ្នកនិពន្ធប្រើបេះដូងមកសសេរ ឯអ្នកអានប្រើកាគិតវិភាគត្រិះរិះពិចារណាទៅលើខ្លឹមសារនិមួយៗអ្នកអានអានបណ្តើរ គិតបណ្តើរ វិភាគបណ្តើរ ពោរពេញដោយស្នាមញញឹម
អត្ថន័យក្នុងសៀវភៅ មានការអប់រំ និងកាលើកទឹកចិត្ត… – សៀវភៅបែបទស្សនះមួយក្បាលនេះពិតជាមានឥទ្ធិពលណាស់ចំពោះវិស័យការងារក្នុងស្ថាប័នផ្សេងៗ ជាបណ្តុំនៃកាគិតទៅរកផ្លូវវិជ្ជមានបានបង្ហាញផ្លូវយ៉ាងទូលាយក្នុងការយកទៅអនុវត្តន៍ជាក់ស្តែង ទៅរកផ្លូវមួយក្នុងន័យអភិវឌ្ឍន៍នូវសមត្ថភាពខ្លួនក្នុងវិស័យការងារ។ – សៀវភៅបែបទស្សនះមួយក្បាលនេះ បានធ្វើអោយខួរក្បាលរបស់ខ្ញុំមានការគិតវិភាគយ៉ាងម៉ត់ចត់ទៅលើអត្ថន័យសៀវភៅ
ព្រោះអ្នកនិពន្ធសសេរសៀវភៅនេះបានបង្កើតនូវសំនួរជាច្រើនដើម្បីអោយអ្នកអានរិតតែមានការគិតក្នុងន័យផ្តល់អោយអ្នកអានប្រឹងគិតស្វែងរកចម្លើយពិតដោយខ្លួនឯង។ – សៀវភៅមួយក្បាលនេះខ្ញុំអានគ្មានរំលងមួយឃ្លាណាឡើយ ព្រោះគ្រប់ពាក្យគ្រប់ឃ្លាសុតតែមានអត្ថន័យដែរខ្ញុំត្រូវដឹង។ ** ជាចុងក្រោយប្អូនសូមអរគុណបងស្រី អ្នកនិពន្ធរតនា ដែរប្រឹងសសេរសៀវភៅបែបទស្សនះនេះឡើងប្អូនពិតជាអរគុណពិតមែន ។ ហើយប្អូនសង្ឃឹមយ៉ាងមុតមាំថានឹងឃើញស្នាដៃតាក់តែងនិពន្ធសៀវភៅរបស់បងជាបន្តបន្ទាប់ទៀតមិនថាជាសៀវភៅបែបទស្សនះ ឬប្រលោមលោក…អូនសង្ឃឹមថាបងចេញស្នាដៃជាហូរហែ។
មនុស្សផ្លាស់ប្តូរទៅតាមបទពិសោធន៍
ខ្ញុំមើលឃើញភាពផ្លាស់ប្តូររបស់មនុស្សទៅតាមពេលវេលា។
គេធ្លាប់ចូលចិត្ត ហើយក៏ប្រែជាលែងចូលចិត្ត។ គេធ្លាប់មិនចូលចិត្ត ហើយក៏ប្រែមកជាចូលចិត្តខ្លាំង។ គេធ្លាប់ត្រគោះបោះបោក ហើយក៏ប្រែមកនិយាយផ្អែមល្ហែម។
ខ្ញុំប្រាប់ខ្លួនឯងថា នេះហើយជាភាពទៀតទាត់របស់ភាពធម្មតា។ គ្រប់យ៉ាងប្រែប្រួលគឺជាធម្មតាទេ!
ខ្ញុំឈរមុខកញ្ចក់ហើយសួរខ្លួនឯងថា តើខ្ញុំមានផ្លាស់ប្តូរទេ?
ស្នាមញញឹមចុងបបូរមាត់លេចឡើងលើមុខខ្ញុំ ខ្ញុំលើកដៃស្តាំផ្អឹបកញ្ចក់ បេះដូងខ្ញុំខ្សឹបប្រាប់ខ្លួនឯងថា ខ្ញុំប្តូរច្រើនណាស់។
ខ្ញុំធ្លាប់និយាយច្រើន ហើយក៏លែងសូវចង់និយាយ ខ្ញុំធ្លាប់ចូលចិត្តណែនាំគេច្រើនហើយក៏ប្រែជាមនុស្សបណ្តោយឱ្យរឿងកើតទៅតាមយថាហេតុ។
ខ្ញុំលែងរួសរាយ លែងខ្វល់ខ្វាយពីមនុស្សជុំវិញខ្លួនហើយ?
អត់ទេ! ខ្ញុំនៅតែខ្វល់! តែខ្ញុំប្តូរ! ប្តូរវិធីនៃការរាប់អាន និងណែនាំគេតែប៉ុណ្ណោះ។ ខ្ញុំឱ្យគេរៀនពីកំហុសរបស់គេ ខ្ញុំឱ្យគេឃើញទឹកចិត្តខ្ញុំនៅពេលដែលគេចង់ឃើញតែប៉ុណ្ណឹង។
ការផ្លាស់ប្តូររបស់ខ្ញុំមួយនេះ ខ្ញុំបានបាត់បង់ក្តីស្រលាញ់ជាច្រើន ខ្ញុំក៏ដឹង! តែខ្ញុំប្តូរហើយ! ខ្ញុំប្តូរមិនមែនព្រោះពេលវេលា តែបទពិសោធន៍!
តែមនុស្សដែលរកការផ្លាស់ប្តូររបស់ខ្ញុំ ក៏រអ៊ូដូចខ្ញុំដែរ!
មនុស្សផ្លាស់ប្តូរតាមពេលវេលា! គេថាខ្ញុំផ្លាស់ប្តូរតាមពេលវេលា តែការពិតនៃយើងទាំងអស់គ្នា គឺមិនបានផ្លាស់ប្តូរទៅតាមពេលវេលានោះទេ គឺយើងផ្លាស់ប្តូរទៅតាមបទពិសោធន៍ វាស្របពេលដែលពេលវេលាមកដល់ យើងក៏ផ្លាស់ប្តូរ។
អត្ថបទអ្នកនិពន្ធរតនា
មតិអ្នកអានចំពោះសៀវភៅប្រលោមលោក “វិថីជីវត”
#វិថីជីវិត ជាសៀវភៅប្រលោមលោកបែបមនោសញ្ចេតនា លាយ ជាមួយ មហ្ហិច្ឆតានិងការតស៊ូ
ដែលអ្នកនិពន្ធបានលើកបង្ហាញពីគំនិតផ្សេងៗ គ្នានៃតួនិមួយៗ ក្នុងនោះវីរីយ៉ាជាតួអង្គសំខាន់ក្នុងសាច់រឿង។
សង្ខេបខ្លីសម្រាប់ខ្ញុំ វីរីយ៉ាទោះបីឆ្គាំងឆ្គងក្នុងរឿងមនោសញ្ចេតនាស្នេហាខ្លះ តែពិតជាស្ញប់ស្ញែងណាស់មិនត្រឹមតែមានមហ្ហិច្ឆតាខ្ពស់ទេ ថែមទាំងជាមនុស្សដែលមានមនុស្សធម៌
ទៀតផង, ចំណែកបញ្ចវន្តឯណោះវិញ មិនសរសើរ មិនបាននូវទឹកចិត្តស្មោះត្រង់ហ៊ានលះបង់គ្រប់យ៉ាង ដោយមិនគិតថាលទ្ធផលគឺបែបណា។ បើនិយាយពីវិមន្តវិញ អាត្មានិយមណាស់ មិនគួរឲ្យចង់សេពគប់ ដូចមិនមានការសម្រេចចិត្តជារបស់ខ្លួនសោះ។
ជាអ្នកធ្វើការ (សម្រាប់អានសាកល្បង)
ឈប់ងរទៅ
សម្រង់មតិអ្នកអាន ពីប្អូនស្រី ញ៉ាវ មិនា
ជូនចំពោះបងស្រី អ្នកនិពន្ធ រតនា សូមអរគុណចំពោះសៀវភៅមួយក្បាលនេះ សៀវភៅនេះជាប្រលោមលោកលើកទឹកចិត្តឲយើងមានចិត្តរឹងមាំនិងតាំងចិត្តចំពោះកិច្ចការដែលយើងចង់សម្រេចដូចវីរិយ៉ា ខ្ញុំចាប់ផ្តើមស្រលាញ់ពណ៌ទឹកសមុទ្រខ្លាំងបន្ទាប់ពីអានរួច វីរិយ៉ាធ្វើឲខ្ញុំមានអារម្មណ៍ថាខ្នាញ់ណាស់ចំពោះកាយវិការគួរឲស្រលាញ់របស់នាង នាងទទួលបានភាពជោគជ័យមិនថាទាំងរឿងការងារនិងរឿងបេះដូង នាងទទួលបានការស្រលាញ់និងកម្លាំងចិត្តពីសំណាក់អ្នកគ្រប់គ្នា នាងឆ្លាតណាស់ក្នុងការធ្វើជំនួញការងារប៉ុន្តែនាងបែរជាមិនសូវស្ទាត់ចំពោះរឿងស្នេហាទៅវិញ នាងបណ្តោយឲម្ចាស់បេះដូងស្នោរនៅឆ្ងាយពីនាងអស់រយៈពេលយូរ ទើបនាងដឹងថានាងមិនអាចខ្វះកាហ្វេទឹកដោះគោទឹកកកបានទើបនាងតាមរកគាត់រហូតទាល់តែបានជួបគ្នាជាគូអនាគត។ ៧ឆ្នាំទៀតទើបខ្ញុំមានអាយុសម្បារនាងប៉ុន្តែតើខ្ញុំត្រូវចាំដល់ទៅ៧ឆ្នាំឬទើបចាប់ផ្តើមការងារនៅក្នុងក្តីស្រម៉ៃ? ខ្ញុំបានចាំនូវអ្វីដែរបញ្ញវ័ន្តបាននិយាយប្រាប់វីរិយ៉ាថា “ឱកាសមិនមែនចេះតែមានទេ បើប្អូនមិនចាប់យកវាទេវានឹងធ្វើឲប្អូនស្ដាយក្រោយ បើប្អូនចង់ចាំក៏ចាំចុះតែប្អូនត្រូវចាំថាប្អូនចាប់ផ្តើមយឺតប្អូននឹងខាតបង់ដូចគ្នា” បន្ទាប់ពីអានឃ្លាមួយនេះហើយខ្ញុំក៏គិតថា អូខេខ្ញុំនឹងចាប់ផ្តើមធ្វើវាឥលូវនេះ ត្រូវដើរទៅមុខដោយខ្លួនឯងនិងព្យាយាមគ្រប់យ៉ាងដោយមោះមុតនិងមិនក្រអើតក្រទម
មួយវិញទៀតមុនពេលដែលខ្ញុំមិនទាន់បានអានសៀវភៅនេះខ្ញុំតែងតែចង់ធ្វើអីជាមួយនឹងមិត្តភក្តិរបស់ខ្ញុំគ្រប់ពេលដោយមិនចង់ឲពួកគេទៅណាឆ្ងាយពីខ្ញុំដល់ថ្នាក់ពេលខ្លះខឹងនឹងពួកគេអត់និយាយរកគ្នាក៏មានដោយសារពួកគេមិននៅក្បែរខ្ញុំប៉ុន្តែឃ្លាមួយនេះវាបានធ្វើឲខ្ញុំស្វាងចែសដូចគេជះទឹកដាក់ “មិត្តភក្តិមិនអាចនៅឬធ្វើការជាមួយយើងរហូតទេ នៅថ្ងៃណាមួយដែលគេរកឃើញគោលដៅគេគង់តែចាកចេញពីយើងដូចគ្នា គ្រាន់តែមិនដឹងថាយើងចេញមុនឬគេចេញមុន” មួយឃ្លានេះរឹតតែធ្វើឲខ្ញុំក្លាហានក្នុងការធ្វើអីដោយម្នាក់ឯង ជាចុងបញ្ចប់រឿងមួយនេះក៏បានបញ្ចប់ទៅដោយសុភមង្គលហើយខ្ញុំក៏បានយល់ថាយើងជាតួអង្គឯកក្នុងខ្សែជីវិតផ្ទាល់ខ្លួនរបស់យើង ហើយយើងក៏ជាអ្នកតាក់តែងវាឡើងដូចគ្នា
គន្លឹះក្នុងការជ្រើសរើសសៀវភៅអាន
ចូរអ្នកគិតដល់អារម្មណ៍មួយ នៅពេលដែលអ្នកដើរចូលទៅក្នុងបណ្ណាគាសៀវភៅ។
អ្នកចង់ជ្រើសរើសសៀវភៅមួយក្បាលដើម្បីអាន តើអ្នកនឹងជ្រើសរើសសៀវភៅមួយណា? មុននឹងធ្វើការជ្រើសរើសសៀវភៅដែលគេតាំងលក់នោះ ចូរអ្នកសួរខ្លួនឯងសិន តើអ្នកចូលចិត្តអានសៀវភៅប្រភេទណា? បើអ្នកចូលចិត្តអានសៀវភៅបែបប្រវត្តិសាស្រ្ត ចូលអ្នកកុំឈរនៅក្នុងតំបន់ដែលគេតាំងសៀវភៅប្រលោមលោកអី ព្រោះចំណងជើង និងគ្របសៀវភៅទាំងនេះអាចទាក់ចិត្តអ្នកឱ្យជ្រើសយកវាទៅដាក់តាំងនៅផ្ទះបាន។ ចូរអ្នកសួរអ្នកលក់ ឬមើលផែនទីទីតាំងនៅក្នុងហាងមួយនោះ ដើម្បីរកកន្លែងដែលគេដាក់លក់សៀវភៅប្រវិត្តិសាស្រ្តវិញទៅ។
ទៅដល់កន្លែងដាក់លក់សៀវភៅទាំងនោះហើយ ក៏មិនមានន័យថាអ្នកអាចចាប់យកសៀវភៅមួយក្បាលណាមកអានក៏បាននោះដែរ។ វាតម្រូវឱ្យអ្នកធ្វើការសាកសួរចិត្តខ្លួនឯងម្តងទៀត តើប្រវត្តិសាស្រ្តបែបណាដែលអ្នកចង់ដឹង?
ប្រវិត្តិសាស្រ្តនៅក្នុងលោកនេះមានច្រើនផ្នែកណាស់ ប្រវត្តិនៃប្រទេសនីមួយៗ ឬប្រវត្តិនៃបិតិកភ័ណ្ឌ ឬប្រវិត្តរបស់បុព្វបុរស ឬផ្សេងៗទៀត។
សួរពីកម្រិតនៃការយល់ដឹងរបស់ខ្លួនឯងផងដែលទាក់ទងនឹងការសិក្សាស្វែងយល់ពីប្រវត្តិទាំងនោះដែរ ដើម្បីធ្វើការជ្រើសរើសសៀវភៅណាដែលអ្នកនឹងចំណាយលុយទិញមកអានហើយមិនស្តាយលុយ។
សៀវភៅនីមួយៗមានការរៀបចំឡើងទៅតាមកម្រិតនៃការស្វែងយល់របស់អ្នកនិពន្ធ ប្រសិនបើកម្រិតទាំងនោះទាបឬខ្ពស់ជាងកម្រិតនៃការទទួលយករបស់អ្នកពេក អ្នកនឹងមិនស្តប់ស្កល់ពីគុណភាពរបស់សៀវភៅនោះទេ។
ដូច្នេះ ការជ្រើសរើសសៀវភៅសម្រាប់អាន មិនមែនគ្រាន់តែអានគ្រប ឬចំណងជើងហើយអ្នកអាចធ្វើការសម្រេចចិត្តបាននោះទេ។ មិនថាអ្នកចូលចិត្តអានសៀវភៅប្រភេទណា ប្រលោមលោកក្តី ទស្សនៈវិជ្ជាក្តី សៀវភៅនីមួយៗតែងមានកម្រិតរបស់វា បើអ្នកមិនច្បាស់លាស់ក្នុងការជ្រើសយកសៀវភៅដើម្បីអានដោយខ្លួនឯងទេ វាប្រៀបដូចជាអ្នកអត់មានសមត្ថភាពក្នុងការចាយលុយទិញសៀវភៅដូច្នេះដែរ។
អ្នកអានទាំងឡាយ ប្រសិនបើអ្នកនឹងចាប់សៀវភៅចំណេះដឹងមួយក្បាលមកអាន ចូរអ្នកអានមាតិការបស់សៀវភៅសិន ហើយជ្រើសយកមាតិកាណាមួយដែលអ្នកចាប់អារម្មណ៍មកអានពីរបីទំព័រសិន សឹមអ្នកសម្រេចចិត្តអាន។