Author: admin

ខ្ញុំចូលចិត្តញញឹមដាក់ព្រះអាទិត្យពេលព្រឹកព្រហាម
ខ្ញុំចូលចិត្តញញឹមដាក់ទេសភាពពណ៌បៃតង
ខ្ញុំចូលចិត្តញញឹមដាក់ផ្កា ជួបរបស់ទាំងបីនេះខ្ញុំតែងញញឹមទាំងមានក្តីសុខ។
តែខ្ញុំក៏នៅមានសមត្ថភាពញញឹមដាក់របស់មួយទៀត គឺបញ្ហា!

មិនមែនខ្ញុំមិនចេះយំទេ តែខ្ញុំគ្រាន់តែពូកែញញឹមជាងយំតែប៉ុណ្ណោះ។ ខ្ញុំព្យាយាមញញឹមឱ្យបានច្រើន ខ្ញុំញញឹមជាទម្លាប់។ ខ្ញុំដឹងថាគ្មានមនុស្សជូតទឹកភ្នែកឱ្យទេ នៅពេលដែលខ្ញុំយំ ដូច្នេះហើយទើបខ្ញុំមិនទម្លាប់យំ។ ហើយខ្ញុំដឹងថាមានមនុស្សចូលចិត្តឱ្យខ្ញុំញញឹមដាក់ ទើបខ្ញុំជ្រើសយកស្នាមញញឹមធ្វើជាសញ្ញាណ។

ពេលនឹកខ្ញុំក៏នឹកដល់ស្នាមញញឹមរបស់ខ្ញុំ
ពេលចង់ឱ្យគេញញឹមដាក់ក៏នឹកដល់ខ្ញុំ
ជាពាក្យដែលខ្ញុំបានទទួលពីមនុស្សរាប់អានគ្នា។
ត្រឹមតែស្នាមញញឹមក៏អាចបង្កើតភាពល្អបានដល់មនុស្សច្រើនបែបនេះ ហេតុអីមិនខំញញឹម?
ពិបាកចិត្តយ៉ាងណាក៏ដោយ ញញឹមបន្តិចទៅហើយប្រាប់ខ្លួនឯងថាមិនអីទេ បន្តិចទៀតលែងអីហើយ។
ជួបមនុស្សផ្សេងៗក៏ត្រូវតែញញឹម មិនស្គាល់ក៏ដោយ មិនចូលចិត្តក៏ដោយ ញញឹមដាក់គេទៅ បានឱ្យមុខយើងស្រស់ដែរ កុំកំណាញ់ស្នាមញញឹមណា៎

អ្នកអានហើយញញឹមផង មិនបានញញឹមដាក់បង ញញឹមដាក់អត្ថបទបងក៏បានដែរ

ប្រាប់បានទេហេតុអ្វីបានជាអ្នកស្រលាញ់មនុស្សម្នាក់នោះ?
ឆ្លើយសិនចាំអានបន្ត ok?
……….. ❤️❤️❤️………

ក្តីស្រលាញ់បច្ចុប្បន្ននេះមានច្រើនហេតុផលណាស់
មនុស្សពីរនាក់ស្រលាញ់គ្នាតែងប្រើហេតុផលនៅពីក្រោយពាក្យស្រលាញ់ទាំងនោះ។
ស្រលាញ់ព្រោះតែចង់បាន គឺជាមនោសញ្ចេតនាពេញនិយមបំផុតដែលមនុស្សជាច្រើនកំពុងតែមាន។
ស្រលាញ់ព្រោះគាត់តាមចិត្តអ្នក ស្រលាញ់ព្រោះគាត់មានបែបនោះ ស្រលាញ់ទាំងនោះដែលគាត់មាន ស្រលាញ់ព្រោះតែស្ញប់ស្ញែង។ ក្តីស្រលាញ់ដែលកើតពីការស្ញប់ស្ញែងចំពោះនរណាម្នាក់ មិនថាជារូបសម្បត្តិ ចំណេះវិជ្ជា ទឹកចិត្ត ចរិយាមារយាទ ឬលក្ខណៈសម្បត្តិផ្សេងៗ ជាការស្រលាញ់ព្រោះតែចង់បាន។
ព្រោះអ្នកចង់បានអ្វីដែលល្អទាំងអស់នោះ ទើបអ្នកស្រលាញ់គាត់។ ថ្ងៃមួយដែលគាត់លែងមានរបស់ទាំងអស់នោះអ្នកនឹងមិនស្រលាញ់គាត់ទៀតទេ។
ស្រលាញ់ព្រោះតែចង់ឈ្នះ វាជាការស្រលាញ់មួយឆាវៗប៉ុណ្ណោះ ផ្តើមស្រលាញ់គ្នាក៏ព្រោះតែការឈ្នះចាញ់ ចុងក្រោយបែកគ្នាវិញក៏ព្រោះតែការឈ្នះចាញ់ដដែរ។ ស្នេហាដែលមានតែហេតុផលឈ្នះនិងចាញ់ នឹងមិននាំអ្នកទៅរកសុភមង្គលឡើយ។

ស្រលាញ់ព្រោះតែអាណិត វាមិនមែនជាស្នេហា តែវាគ្រាន់តែជាចិត្តមេត្តា ហើយវានឹងរំខានដល់មនោសញ្ចេតនាអ្នកទាំងពីរនាថ្ងៃក្រោយ។ ក្តីស្រលាញ់ពិតនឹងមានបង្កប់ការអាណិតមេត្តា តែក្តីអាណិតមេត្តាមិនបានបង្កប់ស្នេហានោះទេ ចូរបែងចែកអារម្មណ៍ឱ្យបានច្បាស់លាស់មុនចាប់ផ្តើមទំនាក់ទំនង ព្រោះថ្ងៃមួយដែលស្នេហាពិតកើតឡើង មនុស្ស
ដែលអ្នកអាណិតអាចមិនមែនជាមនុស្សដែលអ្នកស្រលាញ់ ហើយអំពើល្អកន្លងមកនឹងក្លាយជាអនុស្សាវរីយ៍ឈឺចាប់សម្រាប់ជនរងគ្រោះមិនខាន។
តើមានមនុស្សប៉ុន្មាននាក់ដែលពោលពាក្យថាស្រលាញ់ព្រោះតែស្រលាញ់?
ស្រលាញ់មនុស្សម្នាក់ពិតប្រាកដនឹងមានហេតុផលមានតែមួយគត់ គឺស្រលាញ់ព្រោះតែស្រលាញ់។ ចង្វាក់បេះដូងដែលលោតខុសធម្មតាសូម្បីត្រឹមតែអ្នកនឹកឃើញដល់គេ ច្បាស់ណាស់ថាអ្នកមានអារម្មណ៍ពិសេសចំពោះគេ។
នៅពេលដែលអ្នកស្រលាញ់នរណាម្នាក់ក្នុងហេតុផលព្រោះតែស្រលាញ់ នឹងមិនខ្វល់ថាម្នាក់នោះជានរណា មានប្រវត្តិយ៉ាងណា នៅក្នុងកាលៈទេសៈណា រូបរាងបែបណានោះទេ។ បែបណាក៏ដោយលែងសំខាន់ហើយ សំខាន់បេះដូងអ្នកត្រូវការគេតែប៉ុណ្ណោះ អ្វីដែលអ្នកត្រូវធ្វើគឺ ទទួល យករាល់គុណវិបត្តិរបស់មនុស្សម្នាក់នោះ ឬលះបង់គ្រប់យ៉ាងដើម្បីបានក្បែរមនុស្សដែលអ្នកស្រលាញ់ ឬដើម្បីមនុស្សដែលអ្នកស្រលាញ់មានក្តីសុខ។

ពេលខ្លះមិនចាំបាច់បានរួមរស់ ត្រឹមតែបេះដូងបានយល់ពីគ្នា តែប៉ុណ្ណឹងក៏បាន។ នេះហើយជាស្នេហាពិត

#សំណោកអនុសាវរិយ៍ ពីអ្នកនិពន្ធអារម្មណ៍ បងស្រី​ អ្នកនិពន្ធរតនា​ និយាយបានថាកប់សារីៗៗ។

រចនាបទ បែបផែននៃការសរសេរគឺប្លែកថ្មី ខុសពីគេ ទាក់ទាញ។ អ្នកអានប្រៀបបានកំពុងលួចបើកកូនសៀវភៅកំណត់ហេតុស្នេហ៍របស់គេដូច្នោះដែរ។

រឿងរ៉ាជំពាក់ជំពិនរវាងមនុស្សបួននាក់ បន្តការឈឺចាក់ ទុក្ខសោកឥតស្រានដោយសារតែទង្វើរកាលក្មេងខ្ចី ដែលហៅថាសំណោកអនុស្សាវរិយ៍។ តើការដោះស្រាយរឿងរ៉ាវបញ្ហាអស់នោះ អ្នកនិពន្ធនឹងប្រើវិធីណាទិញអានទាំងអស់គ្នា។

សាច់រឿងមនោសញ្ចេតនា ប៉ុន្តែអ្នកនិពន្ធមិនភ្លេចបញ្ចូលនូវគតិដាសតឿន ដល់យុវជននោះដែរ។ និយាយឱ្យខ្លី គឺវាលើសពីពាក្យថារឿងស្នេហា។ ជាការប្រសើរបើយុវជនបានអានរឿងមួយនេះ ព្រោះគេនឹងអាចរឭកខ្លួន មិនប្រើយុវភាពខុស ហើយអាចដកខ្លួនចេញពីសំណោកអតិតកាល ក៏ដូចជាបញ្ចៀសខ្លួនពីកំហុសដដែល។

តែប្រាប់ថាអានរឿងហ្នឹងហាមយំ! 🤣😅

ដោយណៃយ៉េ

មានអារម្មណ៍បែបណាប្រសិនបើមនុស្សដែលអ្នកទុកចិត្ត បែរជាក្បត់អ្នក?
រឿងសម្ងាត់ដែលអ្នកនិយាយប្រាប់គាត់ គាត់យកទៅនិយាយបន្តឲ្យអ្នកអាម៉ាស់ ពេលវេលាដែលអ្នកខំលះបង់ឲ្យគាត់បានត្រឹមតែជាការរង់ចាំ ក្តីស្រលាញ់ទាំងឡាយដែលអ្នកមានឲ្យគាត់ គាត់មិនឲ្យតម្លៃ…
ច្រើនណាស់ហើយដែលអ្នកលះបង់ឲ្យគាត់ ហើយអ្វីដែលជាលទ្ធផលគឺការខកចិត្ត ព្រោះតែអ្នកមានភ្នែកមិនល្អ អ្នកមើលមនុស្សខុស អ្នកជឿមនុស្សខុស អ្នកកំពុងខកចិត្តណាស់មែនទេ?
……………………..
ចុះបើពេលនេះ អ្នកកំពុងធ្វើរឿងទាំងនេះដាក់នរណាម្នាក់..
ដឹងទេ? គាត់ក៏កំពុងទទួលអារម្មណ៍ដូចដែលអ្នកមាននៅសំណេរខាងលើដែរ គាត់ប្រហែលឈឺខ្លាំងជាងអ្នកផង។
អ្នកប្រហែលភ្លេចខ្លួនហើយ ថាកំពុងធ្វើដាក់អ្នកណា
ប្រហែលម្នាក់នោះមិនសំខាន់ ទើបអ្នកមិនចាប់អារម្មណ៍។
តែ.. ព្រោះតែអ្នកសំខាន់ទើបគាត់រង់ចាំ ព្រោះតែអ្នកគួរឲ្យទុកចិត្តបាននៅក្នុងចិត្តគាត់ ទើបអ្នកអាចដឹងរឿងសម្ងាត់ណាមួយរបស់គាត់។
ថ្ងៃនេះមានច្រលំនិយាយអាថ៌កំបាំងរបស់អ្នកណាទេ?
មានជ្រុលម៉ោងឲ្យអ្នកណារង់ចាំយូរទេ?
កុំស្តាប់រឿងអាថ៌កំបាំងគេបើអ្នកមិនអាចរក្សាអាថ៌កំបាំងនោះបាន។
កុំកំណត់ពេលវេលា បើអ្នកមិនអាចធ្វើអ្វីឲ្យទៀងពេលបាន
កុំសន្យាអ្វីទាំងអស់ បើអ្នកមិនច្បាស់ថាអាចធ្វើបាន
កុំបង្ហាញការគោរពចំពោះអ្នកដទៃ បើអ្នកមិនអាចសូម្បីតែគោរពខ្លួនឯងបាននោះ។
ដឹងច្រើននិយាយតិច
សន្យាក្នុងចិត្ត ប្រព្រឹត្តបានច្រើនជាងសន្យាដោយសម្តី។
ប្រសិនបើអ្នកមិនចង់បានអ្វីនោះពីគេ សូមកុំធ្វើរឿងនោះចំពោះគេអី

ហេតុអ្វីពេលខ្លះអ្នករីករាយនឹងការញ៉ាំអាហារធម្មតា?
ត្រឹមបានញ៉ាំជ្រក់មមាញមួយម៉ាត់ ដូចបានញ៉ាំម្ហូបពីឋានសួគ៌ ហេតុអ្វីអារម្មណ៍សែនល្អយ៉ាងនេះ?
នៅពេលដែលអ្នកចង់បានអ្វីមួយយ៉ាងងប់ងល់ អ្នកនឹងមិនខ្វល់ឡើយថាអ្នកដទៃឃើញវានៅក្នុងរូបរាងបែបណា
រសជាតិបែបណា ឬស្ថិតក្នុងតម្លៃបែបណា អ្វីដែលអ្នកខ្វល់គឺសេចក្តីពេញចិត្តតែប៉ុណ្ណោះ
អារម្មណ៍ដែលស្រលាញ់ ចង់បានដោយពិតប្រាកដនឹងបង្ហាញឲ្យអ្នកឃើញថា ការយល់ឃើញរបស់អ្នកដទៃ តម្លៃនិងទិដ្ឋភាពនៃរបស់មួយនោះនៅក្នុងសង្គមពិតប្រាកដ មិនមានតម្លៃអ្វីស្មើនឹងចិត្តងប់ងល់របស់អ្នកឡើយ។
ហេតុអ្វីពេលនេះជ្រក់មមាញមួយស្លាបព្រា ធ្វើឲ្យអ្នកអាចញ៉ាំបាយដោយមានរសជាតិបំផុត ក៏ព្រោះតែនេះជាក្តីបំណង ជាការចូលចិត្ត និងសេចក្តីពេញចិត្តរបស់អ្នក។
ចុះហេតុអ្វីមនុស្សដែលមានស្រមោលខ្មៅនៃអតីតកាលរាប់មិនអស់ អាចធ្វើឲ្យអ្នកមានសុភមង្គលបាន?
ក៏ព្រោះតែគាត់ជាមនុស្សដែលបេះដូងអ្នកត្រូវការ ការយល់ឃើញរបស់អ្នកដទៃ តម្លៃនិងទិដ្ឋភាពរបស់គាត់នៅក្នុងសង្គម មិនមានតម្លៃស្មើនឹងភាពងប់ងល់នៃបេះដូងរបស់អ្នកឡើយ។
សុភមង្គលរបស់បេះដូង មិនបានស្ថិតនៅលើអ្វីផ្សេងក្រៅពីសេចក្តីស្រលាញ់ពេញចិត្តនោះទេ។
បើអ្នកមិនជឿទេ អ្នកអាចពិសោធន៍ខ្លួនឯងបាន
នៅពេលមួយដែលអ្នកចង់ញ៉ាំអាហារសាមញ្ញយ៉ាងខ្លាំង តែក៏ត្រូវបង្ខំចិត្តទៅញ៉ាំអាហារថ្លៃជំនួស ពេលនោះហើយដែលអ្នកនឹងអាចជ្រួតជ្រៀបខ្លះៗពីអារម្មណ៍ខកបំណង។
ចង់បានសុភមង្គល កុំចោលបេះដូង

កុំច្រណែនបើឃើញគេប្រសើរជាង
កុំតូចចិត្តបើខ្លួនឯងមិនធ្វើបានដូចគេ

ព្រោះខ្លួនឯងកាន់ជើងខ្លួនឯងរហូតមក
ខ្លួនឯងមិនចេះខុសតាំងពីដើមមក
ខ្លួនឯងនេះតែងតែត្រូវរហូតមក
ខ្លួនឯងតែងតែត្រូវបានលើកលែងរាល់កំហុសឆ្គង។
ព្រោះខ្លួនឯងវាយខ្លួនឯងមិនបានទេ ដូច្នេះហើយទើបបណ្តោយឲ្យខ្លួនឯងអត្មានិយម និងអវិជ្ជមានយ៉ាងនេះ។

មិនសប្បាយចិត្តទេបើគេល្អជាង មិនសុខចិត្តទេបើខ្លួនមិនប្រសើរជាងគេ។
ប្រសើរបែបណា? បើខ្លួនឯងទម្រើសខ្លួនឯងឲ្យខូចអស់ហើយ?

បើខ្លួនឯងមិនអាចអប់រំ លួងខ្លួនឯងឲ្យកែប្រែបានទេ ភាពរឹងមានៈនឹងនាំអ្នកទៅរកភាពមិនជោគជ័យរហូត កុំថាឡើយជីវភាពរស់នៅ សូម្បីសម្ព័ន្ធភាពក៏មិនជោគជ័យឡើយ។

ដើម្បីឲ្យជីវិតបានប្រសើរ ខ្លួនឯងត្រូវធ្វើជាគ្រូរបស់ខ្លួន ប្រដៅអប់រំចិត្តខ្លួនឯងឲ្យបានល្អ។
ចង់ទទួលបានសេចក្តីល្អ លុះណាអ្នកអាចដាំសេចក្តីល្អនោះក្នុងចិត្តអ្នកឲ្យដុះសិន។

តំណែងមនុស្សពិសេស គឺតែងតែទទួលបានអ្វីជាពិសេសជានិច្ច មិនថារឿងធំដុំឬតូចតាចយ៉ាងណាក៏ដោយ។
ប្រសិនបើអ្នកមានអារម្មណ៍ខ្វះខាតក្នុងការទទួលបានរឿងទាំងនោះ ក៏ព្រោះតែ…
អ្នកមិនពិសេសទេ!
កុំចេះតែលង់នឹងខ្លួនឯងពេក
កុំចេះតែច្រលំនឹងអារម្មណ៍គេពេក
អ្នកមិនពិសេសទេ! កុំទាមទារ កុំចង់បាន!
ការដែលទន្រ្ទាំចិត្តនរណាម្នាក់ ដើម្បីទាមទារភាពពិសេសនៅក្នុងចិត្តគេ វាជាការសុំ ឬបង្ខំឲ្យគេមកកុហកអ្នកទៅវិញទេ។ ទង្វើពិសេសដែលមិនចេញពីចិត្ត ពីបេះដូងពិត នឹងមិនស្ថិតស្ថេរឡើយ ថ្ងៃក្រោយនឹងសាបរលាបជាមិនខាន។
ថ្ងៃនោះហើយ ដែលអ្នកនឹងទទួលការខកចិត្ត ខកបំណងហើយចាប់ផ្តើមបន្ទោសព្រហ្មលិខិត បន្ទោសគេឬមនុស្សគ្រប់គ្នា។ តែអ្នកមិនបានចាប់អារម្មណ៍ទេថា ពីដើមឡើយជាកំហុសរបស់អ្នកខ្លួនឯងទៅវិញទេ។
កុំចង់ធ្វើជាមនុស្សពិសេសក្លែងក្លាយរបស់នរណាម្នាក់អី បើស្រលាញ់អាណិតខ្លួនឯង។
មនុស្សដែលចាត់ទុកអ្នកជាមនុស្សពិសេសនៅក្នុងចិត្តគេពិត គេនឹងមិនឲ្យអ្នកមានឱកាសទាមទារទង្វើរទាំងនោះពីគេទេ ព្រោះគេតែងព្យាយាមធ្វើគ្រប់យ៉ាងឲ្យអ្នក ដែលលើសពីការរំពឹងទុកទៅទៀត។
ដូច្នេះហើយទើបតែងតែមានពាក្យថា ស្នេហាគឺរំភើបណាស់ ❤️
មនុស្សពិសេសក្លែងក្លាយគ្មានតម្លៃទេ ឈប់ទាមទារណា៎

មនុស្សមិនអាចគេចផុតពីស្រមោលរបស់ខ្លួនឯងបានទេ
បើអ្នកឈរនៅទីដែលមានពន្លឺកាន់តែភ្លឺ ស្រមោលរបស់អ្នកកាន់តែច្បាស់ដូចគ្នាដែរ។
កុំលាក់ស្រមោលខ្លួនឯង! អ្នកលាក់មិនជិតទេ!
កុំខ្លាចស្រមោលរបស់ខ្លួនឯង! វាងើបមិនរួចពីចំណាំងផ្លាតនោះទេ!
អតីតកាលដែលកន្លងហួសហើយ វាជាអ្វីដែលមិនអាចកើតឡើងម្តងទៀតបានទេ អ្វីៗទាំងអស់បានក្លាយជា ការចងចាំ អនុស្សាវរីយ៍ ជាស្លាកស្នាម ឬជាមេរៀន។
ប្រសិនបើមានមនុស្សប្រកាន់ ឬរើសអើងអតីតកាលរបស់អ្នក នោះគ្រាន់តែគាត់កំពុងតែរស់នៅក្នុងភពវង្វេងតែប៉ុណ្ណោះ។ ព្រោះលើផែនដីនេះ គ្មាននរណាដែលមិនធ្លាប់ខុសទេ កំហុសអ្នកណាធ្ងន់ជាងមិនសំខាន់ សំខាន់អ្នកណាអាចកែប្រែបានច្រើនជាង?
ចូររស់នៅជាមួយនឹងបច្ចុប្បន្នឲ្យបានល្អ បើអ្នកមិនចង់ឲ្យថ្ងៃស្អែកមានអតីតកាលដូចថ្ងៃនេះ។

មិនអីទេ! ខ្ញុំអាចធ្វើបាន!
ទោះពេលខ្លះខ្ញុំជួបរឿងខកចិត្តខ្លាំង
ទោះពេលខ្លះឈឺដល់ទឹកភ្នែកហូរ
ខ្ញុំមិនអីទេ! ខ្ញុំធ្វើបាន!
មិនអីទេ! យំហើយគង់តែបានសើចវិញ ធ្វើម៉េចបើជីវិតត្រូវតែបែបហ្នឹង? ខ្ញុំយល់ច្បាស់ថានេះជារសជាតិរបស់ជីវិត
ខ្ញុំធ្លាប់សើច ធ្លាប់រីករាយដែរ តិចច្រើនមិនដឹងទេ តែពេលនេះខ្ញុំយំ ព្រោះតែខ្ញុំត្រូវសើចជាថ្មីម្តងទៀតនាពេលបន្ទាប់នេះ។
តាមពិតបើមិនរំពឹងខ្លាំងពេក ក៏មិនខកចិត្តខ្លាំងដែរ
បើមិនខកចិត្តខ្លាំង ក៏ទឹកភ្នែកមិនហូរដែរ 😥
សំណាងហើយដែលខ្ញុំរឹងមាំ សំណាងហើយដែលខ្ញុំតែងតែនៅទីនេះដើម្បីខ្លួនឯងបាន។
បរិយាកាសក្រោយយំ គឺស្រស់ស្រាយណាស់
កែវភ្នែករបស់ខ្ញុំ បានឃើញទិដ្ឋភាពដ៏ស្រស់ស្អាតរបស់ផែនដី ជីវិតរបស់ខ្ញុំមានន័យដូចជាសម្លដែលមានរសជាតិឆ្ងាញ់បំផុតមួយចាន។
ខ្ញុំពេញចិត្តនូវលទ្ធផលដែលខ្ញុំធ្វើកន្លងមកណាស់ បើកន្លងមកខ្ញុំធ្លាប់ចុះចាញ់នៅតំណាក់កាលណាមួយ នោះជីវិតរបស់ខ្ញុំនឹងមិនទទួលបានគ្រប់រសជាតិទេ ប្រហែលដូចជាសម្លដែលគ្រាន់តែបង់អំបិលហើយបិទភ្លើងតែប៉ុណ្ណឹង 🤣
ខ្ញុំសរសើរខ្លួនឯងណាស់ដែលតែងតែងធ្វើបាន ❤️
មិនដូច្នោះទេ រាល់ពេលខកចិត្តម្តងៗ មិនដឹងថាខ្ញុំមានជីវិតប៉ុន្មានសម្រាប់បន្តលេងហ្គេមជាមួយព្រហ្មលិខិតទេ។

ជីវិតមានតែមួយ ដូច្នេះខ្ញុំត្រូវតែខំដើរឲ្យបានល្អ ចម្អិនសម្លដ៏មានរសជាតិឆ្ងាញ់បំផុតមួយចានសម្រាប់មនុស្សជំនាន់ក្រោយ ❤️
ខ្ញុំ ពេលនេះតំណាងឲ្យអ្នកកំពុងអាន ❤️

ថ្ងៃរំឭកសេចក្តីស្រឡាញ់ជិតមកដល់ ហាងផ្កាជាច្រើនបង្ហោះបង្ហើររូបភាពបាច់ផ្កាអន្ទងបេះដូងមនុស្សស្រី។

អ្នកខ្លះលួច like អ្នកខ្លះ comment អ្នកខ្លះ Share

ចិត្តរំពៃគិត តើគេទិញឱ្យទេ? ចុះបើគ្មានគូស្នេហ៍ គិតបែបណាវិញ? Like comment share ទាំងចិត្តក្រៀមក្រំឬ?

ប្រពៃណីរបស់មនុស្សគឺចូលចិត្តការទទួលជាងការឱ្យ ដូច្នេះឃើញហើយច្រើនគិតរំលង តែបើសាកគិតបញ្ច្រាសវិញ អ្នកប្រហែលបានរីករាយជាងនេះ។

ផ្កាតំណាងឱ្យក្តីស្រឡាញ់ ក្តីស្រឡាញ់មិនសម្រាប់តែគូសង្សារ ស្វាមីភរិយា តែក្តីស្រឡាញ់អាចមានសម្រាប់មនុស្សគ្រប់គ្នា។

គ្មានបុរសជូនផ្កាដល់អ្នក អ្នកអាចជូនផ្កាដល់មនុស្សជាទីស្រឡាញ់ គោរពរបស់អ្នកបាន វាអាចធ្វើឱ្យអ្នកទទួលបានការស្រឡាញ់កាន់តែច្រើនពីពួកគាត់។ ឬគ្មានមនុស្សដែលអ្នកចង់ជូនទេ? ជូនខ្លូនឯងទៅ! បើខ្លួនយើងនេះក៏ចង់បានដែរ ភ្លេចហើយឬអី ថាយើងនេះក៏ត្រូវចេះស្រឡាញ់ខ្លួនឯងដែរ។ គ្រាន់តែចង់បានផ្កាមួយបាច់ ចាំបាច់អីត្រូវរង់ចាំការជូនពីនរណាម្នាក់?

ខ្លាចគេសើចមែនទេ បើទិញផ្កាជូនខ្លួនឯង? បើអ៊ីចឹង ដឹងខ្លួនទៅ យើងហ្នឹងយកសេចក្តីសុខទៅផ្ញើលើចុងបបូរមាត់អ្នកដទៃទៀតហើយ។

រៀនបង្កើតសេចក្ដីសុខឱ្យខ្លួនឯងដោយខ្លួនឯងណា៎

មនុស្សខ្លះចង់បានអំណោយព្រោះតែវាជារបស់ហ្រ្វី
តែមនុស្សខ្លះគាត់ចង់់បានអត្ថន័យនៃការជូនអំណោយទៅវិញទេ។ ខ្ញុំស្រលាញ់ការទទួលអំណោយ ព្រោះខ្ញុំជឿថាអំណោយគឺជាការសម្តែងនូវការស្រលាញ់ យកចិត្តទុកដាក់យ៉ាងកក់ក្តៅ។
តែ តើអ្នកដឹងទេ? រាល់ការជូនអំណោយតែងតែបង្កប់នូវគោលបំណង លើសពីអ្វីដែលយើងចង់បាន។
មនុស្សប្រើការជូនអំណោយក្នុងគោលបំណងបែបណាខ្លះ?
គាត់អាចជូនអំណោយមួយដល់អ្នក ក្នុងគោលបំណងវិនិយោគធំមួយ នោះអាចជាការសុំនូវផលប្រយោជន៍អ្វីមួយ ឬរំពឹងអំណោយពិសេសមួយពីអ្នកវិញ។
គាត់អាចគ្រាន់តែជូនអំណោយដើម្បីឲ្យខ្លួនគាត់សប្បាយចិត្ត ព្រោះតែគាត់ជាមនុស្សចិត្តល្អ សម្រាប់គាត់ អំណោយគ្រាន់តែជាទាន។
ប្រសិនបើគាត់ជាមនុស្សដែលកំពុងលួចប្រតិព័ទ្ធលើអ្នក គាត់កំពុងតែយកអំណោយនោះសុំប្តូរយកបេះដូងរបស់អ្នកហើយ
តែប្រសិនបើគាត់ជាមនុស្សដែលពោរពេញទៅដោយសេចក្តីស្រលាញ់ ការយកចិត្តទុកដាក់វិញនោះ គាត់នឹងជូនអំណោយដើម្បីតែសេចក្តីស្រលាញ់របស់គាត់តែប៉ុណ្ណោះ អ្នកមិនមានអ្វីជូនគាត់វិញក៏គាត់មិនប្រកាន់ សំខាន់អ្នកពេញចិត្តអំណោយដែលគាត់ជូន ឬគាត់ពេញចង់ឲ្យប៉ុណ្ណឹង។
ក្នុងនាមជាអ្នកទទួលអំណោយ គប្បីប្រើបេះដូងទៅទទួល កុំឲ្យតម្លៃអំណោយត្រឹមតែជាតម្លៃនៃទំនិញដែលគាត់ទិញឲ្យ គប្បីកុំរីករាយត្រឹមតែពេលដែលគាត់ឲ្យ។
ការទទួលអំណោយដោយឈ្លាសវៃ ត្រូវបែងចែកទំនាក់ទំនងនិងអត្ថន័យឲ្យបានច្បាស់លាស់ គាត់ឲ្យក្នុងរូបរាងបែបណាមិនសំខាន់ សំខាន់អ្នកទទួលក្នុងរូបរាងបែបណា? ហើយបានបញ្ជាក់ច្បាស់លាស់ប្រាប់គាត់ហើយឬនៅ?
មនុស្សល្អនឹងមិនប្រើសេចក្តីស្រលាញ់របស់នរណាម្នាក់ ដើម្បីរឹបអូសយកអំណោយពីគេទេ។
មនុស្សឆ្លាត នឹងមិនលក់ទឹកចិត្ត ឬបេះដូងឲ្យអំណោយដូចគ្នា។

ខ្លួនឯងផ្តល់កម្លាំងចិត្តឲ្យខ្លួនឯងបែបនេះរហូតមក
ព្រោះខ្លួនឯងដឹងថាមិនមាននរណាយល់ពីខ្លួនឯងជាងខ្លួនឯងឡើយ។
ខ្លួនឯងចាំស្តីបន្ទោសឲ្យខ្លួនឯងរហូតមក ព្រោះខ្លួនឯងទើបដឹងថាខ្លួនឯងបានធ្វើរឿងអីខ្លះ មួយណាជាកំហុសអចេតនាមួយណាជាកំហុសពិតប្រាកដ។
ខ្លួនឯងតាមបង្រៀនខ្លួនឯងរហូតមក ព្រោះខ្លួនឯងទើបដឹងថាខ្លួនឯងខ្វះខាតអីខ្លះសម្រាប់ស្វែងរកជីវិតប្រសើរមួយ។
ខ្លួនឯងនៅជាមួយខ្លួនឯងបែបនេះកន្លងមក ដឹកដៃខ្លួនឯងទៅរកក្តីស្រមៃរបស់ខ្លួនឯង កំដរខ្លួនឯងសើចយំបែបនេះរហូតមក។
ពេលខ្លះទម្រន់ខ្លួនឯងបន្តិច ពេលខ្លះក៏តឹងតែង បែបនេះតែរាល់ដង គ្រាន់តែចង់ឲ្យខ្លួនឯងបានក្លាយជាមនុស្សល្អទាំងចិត្តទាំងកាយ។
ម្នាក់នេះមិនឯកាទេ គ្រាន់តែរឹងមាំបន្ដិចប៉ុណ្ណោះ
ដឹងហើយថាផែនដីមួយទាំងមូលនេះ មិនមែនរស់នៅតែម្នាក់ឯងទេ តែក៏មិនមែនមនុស្សមួយផែនដីកើតមកសម្រាប់កំដរម្នាក់នេះដែរ ដូច្នេះហើយទើបម្នាក់នេះត្រូវតែរឹងមាំបែបនេះកន្លងមក។
មិនគួរចេះតែរំខាននរណាម្នាក់ឡើយ ព្រោះមនុស្សគ្រប់រូបនៅលើផែនដីនេះ មានសម្ពាធរៀងៗខ្លួន បើមិនបានជួយអ្វីដល់មនុស្សដែលស្រលាញ់អ្នកទេ កុំយកសម្ពាធរបស់អ្នកទម្លាក់ឲ្យគាត់តាមរយៈសេចក្តីស្រលាញ់របស់គាត់អី។
មនុស្សល្អមិនអាត្មានិយមទេ