Author: admin

កុំចេះតែគិតថាគេស្រលាញ់យើង!

លង់នឹងខ្លួនឯងពេក ទើបចេះតែគិតថាគេស្រលាញ់អ្នក
ដឹងទេ ភាពស្និទ្ធស្នាល ការយកចិត្តទុកដាក់ ទាំងអស់នោះមិនមែនធ្វើឡើងព្រោះតែចិត្តស្រលាញ់ក្នុងន័យស្នេហាតែម្យ៉ាងនោះទេ។

មនុស្សដែលមានចិត្តទូលាយ រមែងចូលចិត្តរាប់អានដើម្បីបង្កើនទំនាក់ទំនង គាត់មិនប្រកាន់ឋានៈយសសក្តិអ្វីឡើយ គាត់អាចរួសរាយបែបនេះដាក់មនុស្សគ្រប់គ្នា គ្រាន់តែអ្នកមិនដឹង!

មនុស្សដែលមានទឹកចិត្តល្អ គាត់តែងខ្វល់ខ្វាយ ចាំជួយដល់អ្នកដែលទន់ខ្សោយឬកំពុងត្រូវការជំនួយ។ ព្រោះតែគាត់ជាមនុស្សល្អទើបគាត់មិនដែលបង្ហាញថាគាត់មានវត្តមានចំពោះមនុស្សប៉ុន្មាននាក់ដែលមានវិបតិ្ត ក្នុងនោះរួមទាំងអ្នកផងដែរ នេះហើយដែលធ្វើឲ្យអ្នកវង្វេងថាគាត់ធ្វើសម្រាប់តែអ្នក។

ចូលចិត្តនិយាយរឿងក្នុងចិត្តប្រាប់អ្នកជាច្រើន ព្រោះតែគាត់ជាមនុស្សដែលគិតវិជ្ជមានច្រើន គាត់ងាយស្រួលក្នុងការជឿជាក់លើមនុស្ស ឬគាត់ជាមនុស្សមានសំណាងព្រោះគាត់ជួបតែមនុស្សដែលអាចទុកចិត្តបាន។
ដូច្នេះគាត់អាចពិភាក្សារឿងក្នុងចិត្តរបស់គាត់ជាមួយមនុស្សពីរបីនាក់។
ព្រោះអ្នកមិនដឹងថាគាត់បាននិយាយជាមួយអ្នកណាខ្លះ អ្នកក៏យល់ច្រលំថា មានតែអ្នកម្នាក់ឯងដែលអាចដឹងរឿងជាច្រើនរបស់គាត់ គាត់ប្រាប់អ្នកព្រោះតែគាត់ជឿជាក់
ព្រោះតែគាត់ស្រលាញ់អ្នក។

គាត់ប្រហែលជាស្រលាញ់ ចូលចិត្តអ្នកពិតមែន ទើបគាត់តែងតែធ្វើទង្វើទាំងនេះចំពោះអ្នក។
តែត្រូវចងចាំថា ការស្រលាញ់មិនមែនសម្រាប់ប្រើចំពោះតែសេចក្តីស្នេហានោះទេ។ ការស្រលាញ់មានច្រើនរូបរាងណាស់ នៅពេលដែលមនុស្សពីរនាក់មិនបាននិយាយគ្នាឲ្យបានច្បាស់លាស់ នឹងតែងតែមានមនុស្សខកបំណង។

ប្រសិនបើអ្នកខ្លាចជួបនូវការខកបំណង ចូរកុំលង់នឹងខ្លួនឯងពេក។ ចូរកុំបណ្តោយចិត្តឲ្យលិចលង់ក្នុងមនោសញ្ចេតនា
ត្រូវចាំថា ពាក្យស្រលាញ់ដែលគេខ្ជាក់មក អាចមិនមែនជាការស្រលាញ់ពិតផង។ ចុះទម្រាំកាយវិការដែលគ្មានពាក្យសម្តីអះអាង គួរសង្ឃឹមទេថាវាជាស្នេហា?

ស្នេហា គួរមានការបញ្ជាក់ទាំងពាក្យសម្តីផង និងទង្វើផង បើអ្នកបានទទួលបានតែមួយផ្នែក ចូរកុំកំសាកក្នុងការហ៊ានសួរ ត្រូវក្លាហានដើម្បីរំដោះខ្លួនឯងចេញពីពិភពវង្វេងនេះ។

រសជាតិពិសេសរបស់ខ្ញុំគឺនៅពេលម៉ូតូខូច
ម្យ៉ាងដែរ! ជិះទៅមករាល់ថ្ងៃមិនដែលខូច មកខូចអីចំថ្ងៃហ្នឹង? ចុះខូចថ្ងៃណាទើបគួរ? ហិហិ…
មកពីគ្នាមិនដែលខូច ឲ្យគ្នាខូចមួយថ្ងៃទៅ! បណ្តើរម៉ូតូជារសជាតិមួយដែលមិនងាយជួបទេ 😁
ម៉ូតូខូចពេលនៅម្នាក់ឯង ជាបញ្ហាមួយ
ម៉ូតូខូចពេលកាបូបអត់មានលុយ កាន់តែជាបញ្ហាទៀតហើយ 🤣
សំខាន់ព្រលឹមម៉ោង៦ អត់លុយឲ្យគេ គេជេស្លាប់ហើយ 🤣🤣
តើខ្ញុំគួរធ្វើយ៉ាងណា?
ខឹង! មួម៉ៅ! ឆ្លេឆ្លា? រត់រកគេជួយ?

អត់ទេ!
ខ្ញុំរីករាយនិងខ្យល់ត្រជាក់ដែលធ្លាក់ចុះមក
ខ្ញុំបណ្តើរម៉ូតូទៅរកជាង ក្នុងចិត្តបានសួរម៉ូតូខ្ញុំថា
“ឈឺហើយមែនទេ? កូនសម្លាញ់ ❤️”
ពេលនេះអត់មានលុយក្នុងកាបូបទេ តើខ្ញុំគួរធ្វើយ៉ាងម៉េច?
តើនរណាអាចយកលុយមកឲ្យខ្ញុំបាន? តើខ្ញុំគួររំខាននរណាទេ?
ខ្ញុំគ្រាន់តែអត់មានលុយនៅក្នុងកាបូប តែខ្ញុំមានវានៅក្នុងគណនីផ្សេងៗដែលតើ។
សម័យបច្ចេកវិទ្យា មិនចាំបាច់ឲ្យខ្ញុំត្រូវតែរំខានមនុស្សដែលស្រលាញ់ខ្ញុំនោះទេ។
គ្រាន់តែទៅដកលុយពីគណនីនោះមក ក៏អាចដោះស្រាយបញ្ហារួចទៅហើយ។

អ្នកមិនអាចចេះតែរត់គេចពីបញ្ហា ឬរត់ចោលបរិយាកាសសាំញ៉ាំណាមួយ ដោយទម្លាក់ឲ្យនរណាម្នាក់មកទទួលរងជំនួសឡើយ។
គួរតែរៀនជួយខ្លួនឯង សាកល្បងធ្វើខ្លួនឯងសិនមុននឹងសម្រេចចិត្តផ្តល់ឱកាសឲ្យនរណាម្នាក់សម្តែងទឹកចិត្ត។
អ្វីដែលគួរធ្វើបន្ទាប់គឺ ធ្វើចិត្តឲ្យត្រជាក់ រកវិធីសម្របជាមួយបញ្ហា។
ចាត់ទុកថាប្តូរបរិយាកាសមួយថ្ងៃទៅចុះ
ម៉ោងដែលធ្លាប់តែអង្គុយក្នុងហាងញ៉ាំកាហ្វេ ដើម្បីសរសេរអត្ថបទ ប្រែជាម៉ោងអង្គុយក្នុងផ្ទះជាងម៉ូតូ សរសេរអត្ថបទទៅវិញ😁។
ខ្ញុំត្រូវអរគុណម៉ូតូខូច ដែលផ្តល់រសជាតិថ្មីឲ្យអត្ថបទខ្ញុំ និងបទពិសោធន៍ថ្មីមួយឲ្យខ្ញុំ។ ពិសេសគឺប្តូររសជាតិកាហ្វេឲ្យខ្ញុំបានមួយថ្ងៃដែរ។

ឃើញទេ? នេះហើយជាវិធីរស់នៅជាមួយបញ្ហា
កុំហត់នឿយ កុំដាក់សម្ពាធឲ្យខ្លួនឯងពេក
ត្រូវខំរស់ឲ្យសប្បាយជាមួយបញ្ហាដើម្បីបញ្ឈឺអ្នកដែលដាក់បញ្ហានេះមកលើអ្នក ❤️

គេសួរខ្ញុំថាពេលណាបានរៀបការ?
គេប្រាប់ខ្ញុំថាកុំរើសពេកល្មមៗយកទៅ
គេបង្អាប់ខ្ញុំថាប្រយ័ត្នចាស់ទៀតគ្មានអ្នកយក
គេបន្លាចខ្ញុំថាប្រយ័ត្នចាស់ទៅត្រូវនៅម្នាក់ឯង

ពាក្យជាច្រើនងំៗក្នុងត្រចៀកមនុស្សខ្លួនមួយដូចខ្ញុំ មានទាំងសំណួរ មានទាំងការបន្លាច បង្អាប់ រិះគន់។
ពេលខ្លះគេប្រាប់ថាអាណិតខ្ញុំ ខ្ញុំសើចហួសចិត្តក្នុងពោះរួចក៏ចង់ប្រាប់គេវិញដែរថាខ្ញុំក៏អាណិតគេដូចគ្នា។
ធុញទ្រាន់ណាស់ដែរ ហត់ណាស់ដែរ ដែលត្រូវរស់ក្នុងគំនាបសង្គមបុរាណនិយម មនុស្សស្រីគួររៀបការកាន់តែឆាប់កាន់តែល្អ មនុស្សស្រីមិនគួររៀបការម្តងហើយម្តងទៀត។

មនុស្សស្រីអើយ! តើមានប៉ុន្មាននាក់ដែលពេញចិត្តនឹងការដើរតាមគន្លងចាស់បែបនេះ? ហេតុអីអ្នកគិតថាកើតមកជាស្រីគឺបែបនេះហើយ?
ហេតុអីអ្នកមិនគិតថាស្រីក៏ជាមនុស្សដែរ? ហេតុអីចាំបាច់បែងចែកប្រុសនិងស្រី?
ហេតុអីអ្នកមិនមើលឃើញមនុស្សស្រីក្នុងប្រទេសដ៏ទៃដែលគេមានសំណាងជាង?

បើគិតបែបហ្នឹងហេតុអីមិនទៅរស់នៅស្រុកគេទៅ?
ខ្ញុំមិនទៅ! ខ្ញុំស្រលាញ់ប្រទេសខ្ញុំ ហើយខ្ញុំចង់ឲ្យមនុស្សស្រីក្នុងប្រទេសខ្ញុំក៏មានសំណាងដូចមនុស្សស្រីប្រទេសដទៃដែរ។
ហេតុអីក៏មនុស្សស្រីធំឡើងត្រូវតែរៀបការ? ហេតុអីក៏មនុស្សស្រីត្រូវតែលះបង់ក្តីស្រមៃរបស់ខ្លួនដើម្បីស្វាមី ឬគ្រួសារ?
មនុស្សស្រីមិនអាចទទួលយុត្តិធម៍បានទេ?

ខ្ញុំមិនមែនកំពុងធ្វើការប្រឆាំងនឹងការរៀបការនោះទេ។ តែខ្ញុំមានការយល់ឃើញមួយផ្សេងពីគេ តែខ្ញុំជឿថាមនុស្សស្រីមួយចំនូននឹងគាំទ្រការយល់ឃើញរបស់ខ្ញុំ។
ខ្ញុំឆ្លើយមិនបានថាពេលណាទើបខ្ញុំរៀបការ ព្រោះខ្ញុំមិនដឹងថាតើខ្ញុំនឹងជួបមនុស្សអាចឲ្យរៀបការជាមួយបានឬអត់ទេ។
ខ្ញុំមិនរើសរកបុរសដែលល្អឥតខ្ចោះដើម្បីមករៀបការជាមួយនោះទេ ខ្ញុំគ្រាន់តែត្រូវការបុរសម្នាក់អាចរួមផ្លូវដើរជាមួយខ្ញុំបាន ទាំងផ្លូវ Highway ផ្លូវបេតុង និងផ្លូវដែលពោលពេញទៅដោយបន្លានិងដែកគោ។ ព្រោះខ្ញុំជឿថាជីវិតក្រោយអាពាហ៍ពិពាហ៍និងមិនងាយស្រួលដូចជីវិតខ្លួនមួយទេ។
ខ្ញុំស្មើចិត្តនឹងការបង្អាប់ថា ប្រយ័ត្នចាស់ទៀតគ្មានអ្នកយក។ បើដឹងថាបុរសនោះស្រលាញ់ព្រោះតែរូបខាងក្រៅ តើគួរតែស៊ូការទាំងក្មេងជាមួយគាត់ទេ? ចុះអនាគតទៅយើងមិនចាស់ទេអី បើខំការទាំងក្មេងបែបនេះ? ហើយបើការហើយក៏នៅតែចាស់ មានគិតខ្លះទេថាគាត់គង់តែទៅរកស្រីក្មេងៗទៀតដដែល?
យ៉ាងណាបុរសដែលមិនរើសរូបសម្ផស្សគង់តែមាន ហើយបើគង់តែមាន ហើយបើខ្ញុំមានសំណាងជូបនោះ ទោះជួបពេលណាក៏មិនយឺតពេលដែរ។

ឬបើមិនជួបទេចាស់ទៅត្រូវនៅម្នាក់ឯង? ការបន្លាចដែលមិនគួរឲ្យព្រឺសម្បុរសោះ។
នៅម្នាក់ឯងមួយជីវិតវាពិតជាគួរអោយខ្លាចណាស់ តែនៅម្នាក់ឯងមួយជីវិតរឺអត់នោះ ខ្ញុំជឿថាមិនមែនមកពីមានមង្គលការឬអត់នោះទេ។ វាសនាបានចារមកហើយថាជីវិតចុងក្រោយរបស់អ្នកនឹងក្លាយជាបែបណា។
គ្មានអ្នកណាទាយដឹងមុនថាជីវិតគូអាចរស់ជុំគ្នាបានយូរប៉ុនណានោះទេ គ្មានអ្នកណាទៅដឹងមុនថាបុត្ររបស់អ្នកនឹងកំដរអ្នកដល់ថ្ងៃចុងក្រោយរបស់អ្នកបានឬអត់នោះទេ។
ពេលខ្លះមនុស្សដែលស្រលាញ់នឹងកំដរអ្នក នៅជីវិតចុងក្រោយអាចមិនមែនជាសមាជិកគ្រួសាររបស់អ្នកទេ។

មនុស្សមានខ្សែរជីវិតរៀងៗខ្លួន
បើអ្នកកំពុងតែសុខនិងជីវិតគូរបស់អ្នកហើយក៏ខំថែបន្តទៀតទៅក្រែងវាមិនបានសុខដល់ស្អែក
ហើយបើកំពុងតែរកាំរកុះក៏ខំកែរកុនអោយល្អទៅក្រែងបានសុខដូចពីមុនមកវិញ។
មនុស្សនៅម្នាក់ឯងមិនមែនមិនត្រូវការគូ តែគ្រាន់តែមិនទាន់ដល់ពេល ឬមិនមានពេលនោះ…។
យ៉ាងណា មានគូរឺអត់គូ មនុស្សគ្រប់គ្នាសុទ្ធតែសង្ឃឹមបានសុខ។ សុខរបស់អ្នកមានគូប្រហែលបានមកពីដៃគូរបស់គាត់ តែសុខរបស់អ្នកគ្មានគូបានមកតែពីសមិទ្ធិផលរបស់គាត់ខ្លួនឯង។
សេចក្តីសុខងាយនិយាយ ងាយមើលឃើញ តែពិបាករក្សាណាស់ដែរ ត្រូវការឲ្យខំរៀងខ្លួនដើម្បីរក្សាសេចក្តីសុខនោះឲ្យនៅជាមួយខ្លួនបានយូរ។

ដូច្នេះគួរតែខំរក្សាសេចក្តីសុខរៀងៗខ្លួនទៅ អ្នកដទៃគេចេះគិតគូរពីអនាគត និងជីវិតរបស់គេហើយ។

អរគុណចំពោះការអាន
អរគុណចំពោះការពេញចិត្ត និងមិនពេញចិត្ត។

បើក្នុងលោកនេះមានជ័រលុបវេទមន្តអាចលុបកំហុសរបស់យើងបាន ម្ល៉េះវេចនានុក្រមក៏អត់មានពាក្យថាវិប្បដិសារីដែរ។
ព្រោះតែច្បាស់ណាស់ថាគ្មានជ័រលុបវេទមន្តនោះទេ ដូច្នេះមុនធ្វើអីគិតសិន ពិចារណាសិន មិនសមធ្វើកុំធ្វើអី។

រឿងខ្លះវាសមនឹងធ្វើតែក្នុងហេតុផលតិចតួច តែបើគិតដល់ថ្ងៃមុខវាអាចនឹងក្លាយជាកំហុសធំមួយដែលមិនគួរណាអ្នកបានធ្វើរឿងនោះទេ ទាំងនោះមិនមានអីក្រៅពីរឿងសងសឹកនោះឡើយ។
ខឹងគេ! ស្អប់គេ! ចង់សងចិត្តអាក្រក់ដែលគេបានឱ្យនោះទៅគេវិញ។ ថ្ងៃនេះអ្នកបានធ្វើ អ្នកសប្បាយចិត្តព្រោះគេបានទទួលអ្វីដែលអ្នកចង់ឱ្យគេទទួលបាន។ តែថ្ងៃខែដើរទៅហួសបាត់ពេលសប្បាយមួយគ្រានេះ អ្នកក៏ស្រាប់តែគិតដល់ថារឿងនោះជាកំហុសសោះ តែអ្នកបានធ្វើរួចហើយវាក្លាយជាការចងចាំ វាក្លាយជាវិប្បដិសារី អាចកែប្រែអីបាន? មានតែខូចចិត្តនឹងកំហុសខ្លួនឯង។

គិតសិន! មុនធ្វើអ្វីមួយចំពោះអ្នកដទៃ រឿងខ្លះលើកលែងបានក៏លើកលែងទៅ លើកលែងមិនបានក៏គ្រាន់តែដើរចៀសហើយឈប់រាប់គ្នា កុំនៅក្នុងទីដែលជះភាពអាក្រក់ដល់ហត់ហើយក៏កើតវិប្បដិសារីតាមក្រោយ។

ឈ្នះចាញ់មិនបានធ្វើឱ្យចិត្តអ្នកសុខទេ ដើរចេញកាត់ចិត្តឈប់ខ្វល់ទើបចិត្តបានសុខជា។

#អត្ថបទអ្នកនិពន្ធរតនា

ព្រោះតែភាពសក្តិសមតម្រូវឲ្យនាងពាក់ស្បែកជើងកែងជាប្រចាំ
ដើម្បីតែភាពសក្តិសមដឹងទេថាជើងនាងហត់នឿយប៉ុនណា?
ប៉ុន្មានដងដែលនាងតែងតែចង់ប្តូរមកពាក់ស្បែកជើងរត់?
គ្មាននរណាដឹង! ព្រោះនាងព្រមហត់ដើម្បីភាពសក្តិសម។
អ្នកដែលយល់ពីការពិតនឹងគិតថានាងល្ងង់
តែអ្នកដែលស្ថិតនៅក្នុងការពិតដូចនាងអាចនឹងព្រមធ្វើល្ងង់ជាងនាងទៀតផង។

ចូរកុំតាំងខ្លួនជាអ្នកជំនាញវិនិច្ឆ័យលើជម្រើសរបស់អ្នកដទៃ
បើទោះជាអ្នកធ្លាប់ជួបរឿងដូចគ្នា តែមិនប្រាកដថា កាលៈទេសៈ សម័យកាល មជ្ឈដ្ឋានដូចគ្នានោះទេ។