ក្រោយយល់ចិត្តគ្នាបានបួនប្រាំខែ គូស្នេហ៍មួយចំនួនចូលចិត្តបបួលគ្នានិយាយពីជីវិតក្រោយអាពាហ៍ពិពាហ៍។ ការបង្កើតប្រធានបទបែបនេះ ធ្វើឲ្យស្នេហារបស់គាត់កាន់តែផ្អែមល្ហែម ចំពោះមនុស្សស្រីធ្វើឲ្យនាងកាន់តែមានអារម្មណ៍កក់ក្តៅនិងបង្កើនភាពជឿជាកទៅលើដៃគូ។
🌟ខណៈនោះនាងមិនបានដឹងទេថា បុរសម្នាក់នោះនិយាយគ្រាន់តែចង់ឲ្យនាងសប្បាយចិត្ត រឺជាការតាំងចិត្តពិតៗ រឺក៏គ្រាន់តែបោកបញ្ឆោតចិត្តនាង ដើម្បីរក្សាទំនាក់ទំនងស្នេហាបណ្តោះអាសន្នរបស់គេតែប៉ុណ្ណោះ។
អានមកដល់ត្រឹមនេះ កុំទាន់វិនិច្ឆ័យថាបុរសម្នាក់នោះនិយាយដើម្បីអ្វី ងាកមកចាប់អារម្មណ៍ខ្លួនឯងបន្តិចសិន។
ក្រោយការបង្កើតសន្ទនាក្នុងប្រធានបទបែបនេះមិនបានប៉ុន្មាន ទំនាក់ទំនងអ្នកទាំងពីរដើរបានមួយឆ្នាំ ពីរឆ្នាំ បីឆ្នាំ រឺក៏ច្រើនជាងនេះ…
គូស្នេហ៍ខ្លះក៏រង្គោះរង្គើរ ខ្លះក៏បែកបាក់ ហេតុផលព្រោះបុរសម្នាក់នោះនៅតែគ្មានលទ្ធភាព រឺសមត្ថភាពនាំនាងដើរទៅវិថីអាពាហ៍ពិពាហ៍បាន។
កំពុងតែអន់ចិត្ត ខឹង ដៀល បុរសម្នាក់នោះណាស់មែនទេ?
ព្រោះតែអូនចង់រៀបការ ហើយបងឲ្យអូនមិនបាន!
អូនបានដឹងដែរឬទេថាមុននឹងក្រោយរៀបការអូនគួរធ្វើអ្វីខ្លះ?
នាទីជាភរិយា ក្រៅពីគ្រប់គ្រងផ្ទះសម្បែងអូនក៏ត្រូវមាននាទីបង្តើតបុត្រ។
ស្តាប់ទៅដូចជាផ្អែមល្ហែមណាស់ នៅពេលដែលមិនទាន់គិតដល់ជីវភាពគ្រួសារទៅថ្ងៃមុខ។
បើអូនចង់រៀបការ តើអូនមានត្រៀមអ្វីខ្លះដើម្បីនាទីជាភរិយា?
តើអូនចេះបង្កើតចំណូលថិតថេរហើយរឺនៅ?
អូនមានប្រាក់សន្សំដែររឺទេ? អូនមានអ្វីជាទ្រព្យក្រោយមង្គលការដែរឬទេ?
ទោះអូនមិនចង់ជួយចំណាយប្រាក់ក្នុងការរៀបការ យ៉ាងហោចអូនត្រូវមានប្រាក់សន្សំខ្លះជួយស្វាមីចំណាយពេលអូនសម្រាលបុត្រ រឺនៅពេលដែលបុត្រឈឺ។
ព្រោះអូនកំពុងតែចង់រៀបការជាមួយមនុស្សធម្មតា មិនមែនជាអ្នកមានមកពីណា រឺទេវតាជប់ទ្រព្យឡើយ។
បើទោះជានាងមានទ្រព្យទាំងនោះហើយ ហើយប្រសិនបើបុរសម្នាក់នោះអាចផ្តល់អាពាហ៍ពិពាហ៍មួយឲ្យនាងបាន នាងធ្លាប់គិតទេ តើនាងមានអ្វីខ្លះអះអាងថានាងអាចធ្វើជាភរិយាបាន?
ភរិយា មិនអាចចេះតែង៉ក់ងដោយគ្មានមូលហេតុ
ភរិយា មិនអាចតែងតែទារញ៉ាំរបស់ថ្លៃៗ រឺខុសម៉ោងខុសពេលនោះទេ
ភរិយា មិនអាចលួងលោមស្វាមីដោយការនាំគាត់ទៅមើលកុន រឺដើរកំសាន្តរហូតនោះទេ
ភរិយា មាននាទីរក្សានិងបង្កើនទ្រព្យជូនគ្រួសារ
ភរិយា មាននាទីស្រលាញ់មើលថែគ្រួសាររបស់ស្វាមី
ភរិយាត្រូវតែបំពេញនាទី ជាម្តាយរបស់កូន ជាកូន ជាបង ជាប្អូន ជាក្មួយ ជាមីង នៅក្នុងគ្រួសាររបស់ស្វាមីនាង។
ធ្លាប់គិតឬទេថានាងនឹងបំពេញការងារនោះបែបណា?
ទោះនាងនឹងមិនរស់នៅនៅក្នុងគ្រួសារសាច់ថ្លៃ នាងក៏មិនអាចរំលងនាទីទាំងឡាយខាងលើនេះដែរ។
ប្រសិនបើនាងជឿជាក់ថានាងអាចធ្វើរឿងទាំងអស់នោះបានហើយ ត្រឡប់ទៅរកបន្ទាត់មានសញ្ញាផ្តាយ🌟វិញ។
នាងមិនចាំបាច់ខ្វល់ថាបុរសម្នាក់នោះគ្រាន់តែនិយាយឲ្យនាងសប្បាយចិត្តរឺបោកប្រាស់មនោសញ្ចេតនារបស់នាងឡើយ។
បើគេមិនច្បាស់លាស់ជាមួយនាង នាងក៏បានច្បាស់លាស់នឹងការរៀបចំជីវិតខ្លួនឯងហើយ មនុស្សពូកែដូចនាងនឹងមិនខ្វះបុរសល្អចង់រៀបការជាមួយនាងឡើយ។
សំខាន់តើនាងព្រមផ្តល់សំណាងនោះឲ្យទៅបុរសម្នាក់ណា?
