មាត់អ្នកណា?

មាត់អ្នកណា?

ខ្ញុំនេះប្រេនដ៍និយមលើសសមត្ថភាព

ខ្ញុំនេះញ៉ាំឆ្ងាញ់ហួសហើយ

ខ្ញុំនេះជំពាក់បំណុលគេ

ខ្ញុំនេះជាមនុស្សខ្ជះខ្ជាយមិនចេះសន្សំ

ខ្ញុំនេះមួយថ្ងៃៗចេះតែឯបអប

ខ្ញុំនេះល្ងង់ហួស

ខ្ញុំនេះមាននិស្ស័យអន់មិនសូវសង្វាតធ្វើការអីទេ

ខ្ញុំនេះមិនល្អបែបនេះហើយក៏បែបនោះ….

ខ្ញុំបានធ្វើបែបនោះមែនឬទេ? បើខ្ញុំបានធ្វើមែនតើខ្ញុំត្រូវបកស្រាយហេតុផលទាំងអស់ឲ្យផែនដីទាំលមូលយល់ដែរទេ? រឺក៏បកស្រាយឲ្យត្រឹមអ្នកដែលនិយាយអាក្រក់នោះយល់ទៅក៏បានហើយ?

តើមាត់អ្នកណាដែលនិយាយពាក្យអាក្រក់ពីខ្ញុំនេះ? តើមាត់នេះជាមាត់មនុស្សល្អទេ? ឬមាត់មនុស្សល្អគេសម្រាប់និយាយអាក្រក់ រិះគន់អ្នកដទៃបែបនេះ?

មាត់អ្នកដែលនិយាយអាក្រក់ពីអ្នកដទៃគ្រាន់តែចង់អួតអ្នកស្តាប់ថាខ្លួនគាត់ល្អតែប៉ុណ្ណោះ តែការពិតពាក្យអាក្រក់ដែលចេញពីមាត់របស់អ្នកនោះបានបង្ហាយពីសណ្តានពិតរបស់គាត់ទៅហើយ។

មាត់របស់មនុស្សល្អ មិននិយាយអាក្រក់ពីនរណានោះទេ កុំថាឡើយពាក្យរិះគន់ សូម្បីតែសម្តីទ្រគោះក៏សឹងគ្មានផង។

មនុស្សដែលល្អពិត មិនងាយនឹងគិតអវិជ្ជមានទៅលើអ្នកដទៃឡើយ ហើយមនុស្សដែលឆ្លាតក៏មិនចំណាយការគិតអត់ប្រយោជន៍ទៅវាយតម្លៃមនុស្សតាមតែការនឹកឃើញដែរ ជាពិសេសមនុស្សដែលរវល់ក៏មិនមានពេលអង្គុយនិយាយក្រោយខ្នងគេដូច្នេះដែរ។

និយាយឲ្យបានតិច គិតអោយបានច្រើនទើបជានិស្ស័យរបស់មនុស្សឆ្លាត

ហើយនិស្ស័យរបស់មនុស្សល្អគឺគាត់មិនឲ្យសេចក្តីអាក្រក់ទៅនរណាឡើយ កុំថាឡើយត្រឹមតែពាក្យសម្តី សូម្បីតែការគិតប៉ុនប៉ងធ្វើបាប ឬសងសឹកអ្នកដែលឲ្យទោសគាត់ក៏គាត់មិនគិតដល់ផង។

មនុស្សល្អមិនចាយការស្អប់ តែបាចសាចសេចក្តីស្រលាញ់។ បើចង់បង្ហាញថាអ្នកជាមនុស្សល្អត្រូវខំចាយការស្រលាញ់អឲ្យបានច្រើន។

បើមិនទទួលការកែប្រែទេ ក៏បន្តនិស្ស័យមនុស្សល្អលើតែមាត់ខ្លួនឯងតទៅទៀតចុះ!

អ្នកស្តាប់ អ្នកយល់ គេដឹងហើយថាអ្នកល្អប៉ុនណា។