ត្រូវព្យាបាលបេះដូងដែលរលាកដោយខ្លួនឯង

ទឹកមុខសោកសៅគួរឲ្យចង់នៅក្បែរ

ទឹកភ្នែករងថ្លាគួរឲ្យចង់ជូតឲ្យ

ភាសាបេះដូងបញ្ជាក់ពីភាពទន់ខ្សោយ គួរឲ្យចង់ឱបក្រសោបដើម្បីឲ្យអ្នកបានធូរស្បើយ។

មនុស្សជាទីស្រលាញ់របស់ខ្ញុំកំពុងរង់ចាំការលួងលោមពីខ្ញុំ!

បេះដូងមួយនេះឈឺណាស់ ដែលឃើញអ្នកកំពុងតែទទួលរងដូច្នោះ តែអ្វីដែលខ្ញុំជួយបាន គ្រាន់តែប្រាប់ជាមុនថាភ្លើងវាក្តៅណាស់! នៅពេលដែលអ្នកបណ្តោយឲ្យរលាកហើយ ខ្ញុំមិនអាចចូលរួមឈឺជាមួយអ្នកបានទេ។

ការជួយរបស់ខ្ញុំពេលនេះ គឺបានត្រឹមតែឈរមើលនៅម្ខាង

ជីវិតគឺបែបនេះហើយ បើខ្ញុំតែងតែបង្ហាញខ្លួនរាល់ពេលដែលអ្នកមានបញ្ហា អ្នកនឹងមិនរឹងមាំឡើយ។

ខ្ញុំមិនបានទុកអ្នកចោលទេ ខ្ញុំគ្រាន់តែចង់ឲ្យអ្នករៀនរស់ជាមួយបញ្ហា ចេះដោះស្រាយវាដោយខ្លួនឯង។

ខ្ញុំគ្រាន់តែចង់ឲ្យអ្នករឹងមាំតែប៉ុណ្ណោះ!

ទោះខ្ញុំព្រមសន្យាថាអាចជួយអ្នកបានគ្រប់ពេល តែខ្ញុំមិនអាចសន្យាថាជីវិតរបស់ខ្ញុំនឹងអមតៈនៅទីនេះរហូតទេ។

ខ្ញុំអាចធ្វើវាបាននៅពេលដែលជីវិតខ្ញុំនៅមានតែប៉ុណ្ណោះ

ខ្ញុំអាចធ្វើវាបានតែក្នុងខណៈដែលបញ្ហាតូចជាងលទ្ធភាពរបស់ខ្ញុំតែប៉ុណ្ណោះ។

យល់ពីអារម្មណ៍មនុស្សដែលស្រលាញ់អ្នកផង នៅពេលដែលអ្នករអ៊ូថាគ្មានមនុស្សនៅក្បែរពេលមានបញ្ហា

រំឭកវិញផងថាមានមនុស្សប៉ុន្មាននាក់ដាស់តឿនអ្នក មុនពេលអ្នកធ្លាក់ចូលទៅក្នុងបញ្ហា?

រលាកភ្លើងហើយ កុំបន្ទោសនរណាក្រៅពីខ្លួនឯងអី

បើចិត្តអ្នកមិនព្រមលូកចូលភ្លើងដោយខ្លួនឯង បេះដូងរបស់អ្នកក៏មិនរលាកដែរ។

ពេលនេះដឹងថាខ្លួនឯងមិនល្អ ក៏មិនត្រូវស្អប់ខ្លួនឯងដែរ

គួរតែអាណិតដែលខ្លួនធ្លាប់ល្ងង់ លើកនេះយល់ហើយថាភ្លើងវាក្តៅ ថ្ងៃក្រោយត្រូវប្រយ័ត្ន។

ពីថ្ងៃនេះទៅ ត្រូវព្យាបាលបេះដូងដែលរលាកដោយខ្លួនឯង

លួងខ្លួនឯងឲ្យដើរទៅមុខជាមួយបេះដូងស្លាកស្នាម។

ពីថ្ងៃនេះទៅ មិនត្រូវរំលងពាក្យដាស់តឿនឡើយ! គោរពមនុស្សដែលចង់ឲ្យអ្នកល្អ ស្រលាញ់មើលថែខ្លួនឯងឲ្យបានល្អ