សារពាង្គកាយរបស់មនុស្សត្រូវការ ជីវជាតិគ្រប់សព្វដើម្បីទ្រទ្រង់ បើខ្វះជាតិណាមួយ អ្នកនឹងឈឺមិនខាន។
មិនចេះញ៉ាំបន្លែ មិនបាច់ញ៉ាំបន្លែក៏បានតែត្រូវញ៉ាំថ្នាំវីតាមីនជាតិបន្លែ។ ព្រោះតែរាងកាយត្រូវការបន្លែនិងសាច់ មិនចេះញ៉ាំសាច់ក៏ត្រូវញ៉ាំសុត មិនចង់ញ៉ាំសុតក៏ត្រូវញ៉ាំទឹកដោះគោ
ហើយជម្រើសចុងក្រោយគឺនៅតែជាថ្នាំវីតាមីន។
ទាំងនេះជាជីវជាតិរបស់រាងកាយ ចុះអ្វីទៅជាជីវជាតិរបស់ជីវិត?
ជួបរឿងសប្បាយអ្នកក៏សើច បានរស់នៅស្រណុកស្រួលអ្នកក៏មានក្តីសុខ វាប្រៀបដូចជារាងកាយដែលកំពុងញ៉ាំអាហារឆ្ងាញ់។
តែនៅពេលដែលជួបរឿងពិបាកកាយ វេទនាផ្លូវចិត្ត អារម្មណ៍ អ្នកអាចស្រមៃដល់ក្មេងតូចដែលត្រូវបង្ខំឲ្យញ៉ាំ បន្លែ ឬច្រលំខាំម្ទេស គឺមិនខុសគ្នាទេ។ បើមិនខ្សឹកខ្សួល ក៏ស្រែកយំមួយទំហឹងដែរ ក្មេងគួរឲ្យស្រលាញ់ខ្លះចេះនៅរអ៊ូទៀតផង។
គិតមកដល់ខ្លួនឯងវិញ សេចក្តីសុខ វាជាវីតាមីនតែមួយផ្នែកទេ បើចង់ឲ្យជីវិតទៅមុខបានទាល់តែព្រមទទួលគ្រប់ជីវជាតិ សុខនិងទុក្ខ លំបាកស្រណុក សើចផង យំផង ទើបជីវិតមានន័យ។
មិនថា ឧបសគ្គឬជោគជ័យ គ្រប់យ៉ាងសុទ្ធតែមានលើកទីមួយ ទើបតែជួប វានឹងពិបាកគ្រប់គ្រងអារម្មណ៍បន្តិច តែបើមានលើកទីពីរ នឹងមានការត្រៀមទុកហើយ។ កុំរំជួលចិត្តខ្លាំងពេក រម្ងាប់អារម្មណ៍ហើយទទួលយកអ្វីដែលកំពុងជួប រឹងមាំដើម្បីឆ្លងកាត់វាទៅរករសជាតិថ្មី។