អន់ចិត្តណាស់នៅពេលដែលមនុស្សដែលអ្នកស្រលាញ់មិនអាចចំណាយពេលជាមួយអ្នកបាន
មិនអាចឲ្យនូវអ្វីដែលអ្នកត្រូវការ មិនអាចធ្វើតាមការសន្យា..
បេះដូងកំពុងឈឺ អារម្មណ៍សោកសៅ ទឹកភ្នែកហូរប្រដេញ
មានពាក្យជាច្រើនចង់រៀបរាប់…
ចង់បង្ហាញចេញមកឲ្យអស់ ឲ្យម្នាក់នោះបានយល់ពីអារម្មណ៍របស់អ្នកពេលនេះ។
ពេលនេះអ្នកមិនសប្បាយចិត្តទេ គឺព្រោះតែគេ!
អ្នកមិនសុខចិត្តទេ បើគេអាចធ្វើអ្វីផ្សេងទៀតបានដោយមិនបង្ហាញថាមានការសោកស្តាយដែលខុសឆ្គងអារម្មណ៍អ្នក។
អ្នកមិនសុខចិត្តទេ បើគេមិនទទួលអារម្មណ៍ស្រដៀងអ្នកខ្លះៗ។
អ្នកចង់ឲ្យគេចូលរួមអារម្មណ៍ឈឺចាប់ជាមួយអ្នកតើមែនទេ?
តើការស្រលាញ់របស់អ្នកមានតែការទាមទារទេមែនទេ?
គ្មាននរណាម្នាក់មិនចង់បំពេញចិត្តមនុស្សជាទីស្រលាញ់របស់ខ្លួននោះទេ តែមនុស្សគ្រប់រូបរមែងមានភារៈរាប់មិនអស់។
នៅពេលដែលមនុស្សស្មោះត្រង់ អាក់ខានសន្យា គាត់ក៏មិនសប្បាយចិត្តដែរ តែកាលៈទេសៈត្រូវបង្ខំឲ្យគាត់សង្កត់ចិត្ត លាក់អារម្មណ៍ខ្លះ ដើម្បីបានបំពេញភារៈដែលគាត់ត្រូវធ្វើឲ្យបានរួចរាល់។
មនុស្សពូកែតែងចេះបែងចែក ថ្លឹងថ្លែង ដើម្បីចាប់យកឱកាសដើរទៅរកគោលដៅសំខាន់មួយ។
យ៉ាងណាមិញ មនុស្សមានការទទួលខុសត្រូវ នឹងមិនចំណាយពេលទៅលើស្នេហាតែម្យ៉ាងទេ!
គឺស្នេហា និងអនាគត!
ក្នុងនាមអ្នកជាមនុស្សដែលអះអាងថាស្រលាញ់គាត់ បើមិនអាចជួយអ្វីគាត់បានទេ គ្រាន់តែកុំរាំងស្ទះដំណើរគាត់អី
បើអាចធ្វើបាន គួរតែបញ្ឈប់នូវការបង្ហាញអារម្មណ៍អន់ចិត្តមួយឆាវៗនេះចេញ ព្រោះវាធ្វើឲ្យគាត់កាន់តែមានអារម្មណ៍មិនល្អ ជាមូលហេតុឲ្យគាត់មិនអាចសម្រេចកិច្ចការរបស់គាត់បានរាល់ពេលដែលភារៈទាំងនោះក្លាយជាជម្រើសរវាងអ្នក។
ឈប់ទៅ! ក្នុងការយំយែក បង្ហាញអារម្មណ៍ទុក្ខសោក ក្នុងរឿងដែលមិនមែនជាបញ្ហា!
បើអ្នកគិតថាស្នេហាមួយនេះរបស់អ្នកសម្រាប់មួយជីវិត គួរតែព្យាយាមធ្វើអ្វីដែលមានប្រយោជន៍ក្នុងការកសាងគ្រឹះស្នេហារបស់អ្នកឲ្យរឹងមាំពេញមួយជីវិតផង។