មេឃភ្លៀងយប់នេះហាក់នឹកគេ ស្រណោះម្ល៉េះទេធ្លាប់ឆ្លងឆ្លើយ
ខានជួបគ្នាយូរៗណាស់ហើយ មិនដឹងទេអើយគេសុខអត់?
អ្នកនៅខាងនេះមិនទាន់ភ្លេច នៅចាំជានិច្ចគ្រាកម្សត់
ឱបយំរៀបរាប់ដល់ភ្លេចហត់ ព្រមស៊ូរអំណត់ឱ្យស្នេហ៍រស់។
ជ្រុលដាក់ចិត្តហើយមិនចង់បែក បើទោះថ្ងៃស្អែកឈឺឥតលោះ
មិនចង់ឱ្យស្នេហ៍សល់តែឈ្មោះ តែត្រូវរបួសព្រោះខកចិត្ត។
គេចេះក្បត់ផិតមានស្នេហ៍ថ្មី គេលែងប្រណីលែងអាណិត
គេវក់ល្បែងស្នេហ៍លែងចេះគិត បោះចោលដួងចិត្តដែលស្មោះស។
ភ្ញាក់ខ្លួនម្តងៗតាមសុំទោស សុំលាងកំហុសដោយអង្វរ
អង្រួនបេះដូងសុំបន្ត បន្ទាប់មកក៏ស្មោះលែងសម។
គេក្បត់គេស្មោះគេថ្នមថែ ពង្វក់ឥតល្ហែបេះដូងខ្ញុំ
ទាំងស្អប់ស្រលាញ់នៅរួមផ្គុំ ឲ្យខ្ញុំសើចយំព្រោះស្នេហា។
បែកគ្នាយូរហើយនៅតែនឹក ថ្ងៃខ្លះរឭកឥតឧបមា
បើទោះគេបានក្បត់សាវា ក៏ចិត្តស្នេហាស្ម័គ្រមិនសូន្យ។
មេឃភ្លៀងយប់នេះឲ្យចិត្តហ៊ាន តែងកាព្យបំពានហែកបេះដូង
កណ្តាលអាធ្រាត្រងងឹតសូន្យ បង្ហោះកាព្យឃ្លោងរឭកស្នេហ៍។
១២អាធ្រាត ១៤កញ្ញា២០១៩