Day: July 3, 2019

ខុសហើយបើទៅធ្វើការដើម្បីតែរកប្រាក់ចំណូលនោះ កន្លែងធ្វើការផ្តល់ឱកាសរៀនសូត្រច្រើនណាស់ដែលមនុស្សភាគច្រើនតែងមើលរំលង។

កន្លែងធ្វើការរបស់ខ្ញុំគឺសាលាដែលខ្ញុំត្រូវទៅរៀនពីកង្វះខាតនៃជំនាញផ្សេងៗ ដើម្បីទំនប់បម្រុងសុភមង្គលគ្រួសាររបស់ខ្ញុំក្នុងពេលបច្ចុប្បន្ននិងអនាគត។

កន្លែងធ្វើការគឺជាទីកន្លែងដែលនាំឱ្យអ្នកជួបមនុស្សមកពីកន្លែងផ្សេងៗគ្នា ការអប់រំ និងមជ្ឍដ្ឋានរស់នៅផ្សេងៗគ្នា ដែលមនុស្សទាំងនោះផ្លាស់ប្តូរបទពិសោធន៍គ្នាទៅវិញទៅមក។ 

ថ្ងៃខ្លះខ្ញុំបានរៀនពីរបៀបធ្វើជាមនុស្សកាច ពេលខ្លះខ្ញុំក៏បានរៀនពីវិធីតតាំងនឹងបញ្ហាផ្សេងៗ កន្លែងធ្វើការធ្វើឱ្យខ្ញុំរឹងមាំដោយមិនដឹងខ្លួន។ 
កន្លែងធ្វើការបង្រៀនវគ្គពិសេសមួយទៀត ពេលដែលខ្ញុំឮគេនិយាយពីរឿងគ្រួសារ ខ្ញុំអាចស្តាប់ហើយយកទៅពិចារណាថាថ្ងៃមុខ ខ្ញុំនឹងក្លាយជាម្តាយ ឪពុក ឬភរិយាស្វាមីដោយវិធីណាទើបគ្រួសារមិនមានជម្លោះច្រើន ហើយកាន់តែពិសេសទៀតនោះ គឺការផ្លាស់ប្តូរជំនាញផ្សេងៗ ដូចជា ការដាំស្ល ឬ ការជួសជុល ឬវិធីសាងភាពផ្អែមល្ហែម សាងលំនឹងសុភមង្គលសម្រាប់គ្រួសារ។ 

ចូរកុំស្តាប់រឿងដែលពួកគេរអ៊ូរ ហើយយកមកគិតអវិជ្ជមាន បែបនេះអ្នកប្រាកដជាបានបទពិសោធន៍ជាច្រើន។ 
ទៅធ្វើការរាល់ថ្ងៃ ដូចទៅសាលា និងធ្វើការប្រឡង តាមពិតជារឿងសប្បាយមួយបែបដែរ បើគិតងាយៗតាមបែបវិជ្ជមានបែបនេះ។ 

រៀនពិចារណារកហេតុផលវិជ្ជមាន និងចាប់យកតែចំនុចល្អៗដែលអ្នកបានជួប ជីវិតនឹងមានសុភមង្គលច្រើន។ 

#អត្ថបទអ្នកនិពន្ធរតនា

គ្រប់ទំនាក់ទំនងសាងឡើងព្រោះតែប្រយោជន៍!

កុំខឹងគេ បើដឹងថាគេរាប់អានអ្នកព្រោះតែប្រយោជន៍
បើខឹង ត្រូវសួរខ្លួនឯងវិញ តើអ្នកមិនចង់បានប្រយោជន៍ពីគេទេឬ? កុំកុហកឲ្យសោះ! 

ប្រយោជន៍មានច្រើនរូបរាងណាស់ គ្រាន់តែមិនដឹងថារូបរាងបែបណាដែលអ្នកចង់បានពីគេ។

ស្គាល់គ្នាទៅ ស្និទ្ធស្នាលគ្នាទៅ ក៏ព្រោះតែ

១. ស្រួលទំនាក់ទំនងការងារជាមួយគ្នា
២. ថ្ងៃមុខអាចក្លាយជាដៃគូសហការមុខជំនួញផង 
៣. ម្នាក់នោះមានកិត្តិនាមល្អនៅក្នុងសង្គមបច្ចុប្បន្ន
៤. គាត់មានចំណេះដឹង ងាយស្រួលប្រឹក្សា
៥. គាត់ចិត្តល្អ
៦. ចង់បានគាត់ធ្វើជាមិត្តល្អ
៧. មានច្រើនទៀត ទាល់តែរកនឹកខ្លួនឯង😁

ពេលនេះឆ្លើយបានឬនៅថាប្រយោជន៍មួយណាដែលអ្នកចង់បានពីមនុស្សដែលអ្នកកំពុងមានទំនាក់ទំនងជាមួយ?

អ្នកអាចកំពុងគិតដល់មនុស្សម្នាក់ ហើយឆ្លើយយកចំនុចទី៦ តែម្នាក់នោះបែរជាឆ្លើយយកចំនុចទៅ១ នៅពេលដែលគិតដល់អ្នក។

ដូច្នេះទំនាក់ទំនងរបស់អ្នកទាំងពីរមិនមែននៅលើផ្លូវនៃចំនុចទី១ ឬទី៦នោះទេ វាត្រូវតែ ៦បូក១ បើអ្នកទាំងពីរធ្វើឲ្យបាត់ចំនុចណាមួយ ទំនាក់ទំនងនឹងប្រែមកជាចំនុចសូន្យវិញមិនខាន។

ចំនុចសូន្យចាត់ទុកថារួចខ្លួន បើចំនុចដកសូន្យគឺអាក្រក់ណាស់ នៅពេលដែលក្លាយពីមិត្តទៅជាមនុស្សដែលស្អប់គ្នា។

តែយ៉ាងណា ពេលមនុស្សពីរនាក់ចាប់ផ្តើមសាងទំនាក់ទំនងណាមួយជាមួយគ្នា ពួកគេមិនប៉ងឲ្យទំនាក់ទំនងនោះត្រូវបញ្ចប់ឬ ត្រូវស្អប់គ្នានៅពេលក្រោយនោះទេ។

ដូច្នេះដើម្បីឲ្យទំនាក់ទំនងមួយរលូនទៅមុខបានយូរ គប្បីឧស្សាហ៍ថ្លឹងចិត្តគេ និងចិត្តខ្លួនឯងឲ្យបានស្មើ។
ផ្តល់ឲ្យគេតាមដែលគេឲ្យបាន ឬទទួលពីគេតាមដែលខ្លួនអាចឲ្យគេវិញបាន។

កុំលោភលន់! កុំអាត្មានិយម!
កុំចង់ចំណេញនាំដាច់ចំណង❤️

#អត្ថបទអ្នកនិពន្ធរតនា

រឿងមួយដែលមនុស្សភាគច្រើនចូលចិត្តធ្វើ ទោះដឹងថាវាមិនល្អ។ 
អ្នកខ្លះព្យាយាមហាមឃាត់ដែរ តែចេះតែភ្លេចខ្លួនម្តងម្កាល
តែអ្នកខ្លះបែរជារីករាយនឹងការធ្វើបែបនេះណាស់ គាត់ប្រើនិស្ស័យបែបនេះជាប្រចាំ។

នៅពេលដែលអ្នកដទៃមិនមានអ្វីដូចដែលគាត់មាន
នៅពេលដែលអ្នកដទៃមិនធ្វើអ្វីដូចដែលគាត់ធ្វើ

គាត់ចាត់ទុកថានោះជាកំហុស ជាអ្វីដែលមិនត្រឹមត្រូវ 
គាត់មិនបានធ្វើការពិចារណាឬវែកញែក ថ្លឹងថ្លែងអ្វីទាំងអស់
អ្វីតែម្យ៉ាងដែលគាត់អាចប្រតិបត្តិបានយ៉ាងលឿននោះគឺ រិះគន់ និងពេបជ្រាយ។

តាមពិតជីវភាពនៅក្នុងសង្គម តម្រូវឲ្យមនុស្សយល់ឃើញ និងធ្វើរឿងផ្សេងៗគ្នា បើទោះជាការគិតមិនដូចគ្នា ក៏មិនអាចបញ្ជាក់ថាម្នាក់ណាខុសឬត្រូវដែរ។

ទង្វើមួយដែលមិនដឹងថាត្រូវឬខុសចំពោះមតិទូទៅទេ ប៉ុន្តែវាត្រូវចំពោះមនុស្សម្នាក់ ឬជាជម្រើសដែលគាត់ត្រូវតែធ្វើ។
គាត់ក៏មិនចាំបាច់បកស្រាយប្រាប់អ្នកដទៃដែលមិនពាក់ព័ន្ធបានយល់ពីហេតុផលរបស់គាត់ឡើយ ព្រោះគ្រប់ជីវិតតែងមានឯកជនភាព។

គ្មាននរណាម្នាក់ចង់ឲ្យអ្នកដទៃដឹងឮ ឈឺឆ្អាល ត្រួតត្រានូវភាពឯកជនរបស់ខ្លួនឡើយ ដូច្នេះហើយទើបការបកស្រាយនៅក្នុងជម្រើសរបស់មនុស្សម្នាក់ៗមិនងាយនឹងបង្ហាញ។

ព្រោះតែអ្នកមិនបានដឹងពីហេតុផលនៃជម្រើស 
ព្រោះតែអ្នកមិនស្ថិតនៅក្នុងស្ថានភាពមួយនោះ
ព្រោះតែអ្នកមិនមែនជាមនុស្សម្នាក់នោះ
សូមកុំធ្វើការវាយតម្លៃ រិះគន់ទៅលើជម្រើសរបស់អ្នកដទៃ

ព្រោះអ្នកក៏មិនចង់ឲ្យនរណាម្នាក់ធ្វើរឿងនេះដាក់អ្នកដូចគ្នា
ដូច្នេះដើម្បីសេចក្តីសុខរៀងខ្លួន មិនគួរចាប់អារម្មណ៍រឿងផ្ទាល់ខ្លួនរបស់អ្នកដទៃពេកទេ។ 
គួរយកចិត្តគេមកទុកក្នុងចិត្តអ្នកឲ្យបានច្រើន រស់នៅកុំឲ្យប៉ះពាល់គ្នា។
បែបនេះមនុស្សនឹងមិនសូវស្អប់គ្នា និងរស់នៅកាន់តែមានសេចក្តីសុខទាំងអស់គ្នា។❤️

#អត្ថបទអ្នកនិពន្ធរតនា

យំ! បើស្រែកយំឲ្យខ្លាំងៗ តើភាពវេទនាដែលកំពុងតែមាននេះ នឹងរលាយទេ?

បើហ៊ានតែស្រែកយំ ខ្ញុំនឹងឃើញមានមនុស្សពីរបីនាក់មកឱបខ្ញុំ ពួកគាត់ប្រហែលជាស្ម័គ្របែកទ្រូងជំនួសខ្ញុំ។

តែខ្ញុំមិនដាច់ចិត្តឲ្យមនុស្សដែលស្រលាញ់ខ្ញុំ រួមលំបាកជាមួយខ្ញុំនោះទេ យ៉ាងហោចស្នាមញញឹមរបស់គាត់ពេលនេះក៏ជាកម្លាំងចិត្តមួយផ្នែក ដែលអាចឲ្យខ្ញុំខំលេបទឹកភ្នែកចូលវិញ។

លំបាកណាស់! ខ្ញុំលំបាកណាស់! ខ្ញុំចង់តែហែកទ្រូងយកចិត្តដែលឈឺនោះមកឱបក្រសោបឲ្យបានធូរស្រាល។

ខ្លួនឯងលួងលោមខ្លួនឯងបែបនេះ 
ខ្លួនឯងទាញដៃខ្លួនឯងឲ្យក្រោកទៅមុខបន្តបែបនេះ

ខ្ញុំដឹងច្បាស់ថាខ្ញុំនឹងមិនអាចឆ្លងផុតទុក្ខសោកបានទេ បើខ្ញុំនៅតែឈរធ្មឹងនៅទីនេះ
ខ្ញុំដឹងច្បាស់ថាបើខ្ញុំមិនរឹងមាំ ខ្ញុំក៏មិនអាចឆ្លងផុតដែរ។
ខ្ញុំដឹងច្បាស់ថាបើខ្ញុំទន់ជ្រាយ ទាំងខ្លួនខ្ញុំនិងមនុស្សស្រលាញ់ខ្ញុំនឹងកាន់តែពិបាក។

ដូច្នេះខ្ញុំមិនអាចទន់ជ្រាយបានទេ! 

#អត្ថបទអ្នកនិពន្ធរតនា

កាលបើឃើញភាពល្អរបស់នរណាម្នាក់ដែលធ្វើឲ្យអ្នកគាប់ចិត្ត ដេកដើរឈរអង្គុយ ចង់តែឃើញភាពល្អមួយនោះ ចង់ធ្វើយ៉ាងណាឲ្យបានក្បែរ បានស្និទ្ធស្នាលនឹងម្នាក់នោះ។

ស្រលាញ់ភាពល្អមួយនោះ
ស្រលាញ់ព្រោះគាត់មានភាពល្អមួយនោះ
កាន់តែស្រលាញ់ព្រោះមានមនុស្សជាច្រើនក៏ស្រលាញ់ដែលគាត់មានភាពល្អមួយនោះ។

ការស្រលាញ់ធ្វើឲ្យអ្នកលង់ 
អ្នកខ្លះលង់ធ្វើតាមអ្វីដែលគាត់ធ្វើ 
អ្នកខ្លះក៏គ្រាន់តែស្រលាញ់ស្ញប់ស្ញែង តាមគាំទ្រអ្វីដែលគាត់ធ្វើ
តែអ្នកខ្លះស្រលាញ់ដោយច្រណែន ស្រលាញ់ចង់ធ្វើតាម ចង់ឲ្យបានដូចឬលើសគាត់ទៅវិញ។ បើសិនជាអ្នកចិត្តចង្អៀតជាងនេះតែបន្តិច អ្នកអាចរកស្នៀតឲ្យគាត់លិចលង់ដើម្បីឲ្យអ្នកខ្លួនឯងបានលេចធ្លោទៅវិញ។

ដ្បិតណាស់គ្រប់មនុស្សតែងតែមានភាពល្អនិងអាក្រក់ បើសិនជាអ្នកគ្រប់គ្រងភាពអាក្រក់មិនបានទេ សេចក្តីល្អដែលអ្នកខំធ្វើ គ្រាន់តែជាការសម្តែងតែប៉ុណ្ណោះ។
មិនថាទង្វើល្អក្នុងរូបភាពបែបណា វាគ្រាន់តែដើម្បីមុខមាត់និងកិត្តិយសតែប៉ុណ្ណោះ។

ទង្វើល្អដែលចេញពីចិត្តពិតៗ នឹងមិនត្រូវការប្រយោជន៍តបស្នងមកខ្លួនឯង តែដើម្បីតែប្រយោជន៍រួម ឬប្រយោជន៍ចំពោះមនុស្សដែលអ្នកលះបង់សេចក្តីល្អឲ្យតែប៉ុណ្ណឹង។

រីឯការស្រលាញ់ចំពោះនរណាម្នាក់ មិនថាជាការស្រលាញ់គាំទ្រ ស្ញប់ស្ញែង ជាការស្រលាញ់ក្នុងន័យស្នេហា ឬការស្រលាញ់រាប់អានឡើយ បើអ្នកមានការស្រលាញ់ពិត អ្នកនឹងមិនចង់ប្រៀបធៀប ឈ្នះចាញ់ ឬត្រូវការប្រយោជន៍អ្វីពីមនុស្សទាំងនោះក្រៅតែពីបានឃើញសេចក្តីសុខនិងភាពរីកចម្រើនរបស់គាត់ឡើយ។

#អត្ថបទអ្នកនិពន្ធរតនា

ពិបាកចិត្ត មកពីបារម្ភ! បារម្ភ មកពីខ្លាច!

ខ្លាចធ្វើអី? បើរឿងត្រូវកើតវាគង់តែកើត

ចុះបើវាកើតឡើងមែនគួរធ្វើយ៉ាងម៉េចទើបមិនឲ្យខ្វល់?
ចុះដែលខំខ្វល់ទាល់តែរីងរៃខ្លួននេះ មានប្រយោជន៍អីហើយឬនៅ?

នរណាមិនខ្លាច? នរណាមិនបារម្ភ?
ប៉ុន្តែការខ្លាចនិងបារម្ភហួសហេតុពេកមិនបានជួយអ្វីទេ។
ខ្លាចតិច បារម្ភតិច រកដំណោះស្រាយឲ្យបានច្រើន ត្រៀមចិត្តត្រៀមកាយឲ្យបានច្រើនទើបប្រសើរ។

ខ្លាចចុះ បារម្ភចុះ! តែត្រូវចេះត្រៀមខ្លួន បើហេតុកើតមែន អ្នកក៏មានដំណោះស្រាយរួចទៅហើយ។ ចុះបើដឹងថានឹងទៅតាមជម្រើសដែលត្រៀមរួចទៅហើយ នៅខ្វល់ធ្វើអីទៀត?

ត្រៀមចិត្ត ត្រៀមកាយទទួលយកហេតុដែលនឹងកើត ហើយរឹងមាំក្នុងការដើរទៅរកផ្លូវដែលជាដំណោះស្រាយ។ 

ឈប់ពិបាកចិត្តទៅ! ខាតពេលណាស់! 
កុំយំរង់ចាំបញ្ហាមកដល់ ប្រើពេលដែលនៅសល់សប្បាយតាមការគួរ
បើបញ្ហាមកដល់ ដំណោះស្រាយក៏ត្រៀមរួចហើយ! 

ធ្វើចិត្តឲ្យសប្បាយៗ ណា៎ 
បើធូរចិត្តហើយញញឹមផង 😊

#អត្ថបទអ្នកនិពន្ធរតនា

អ្នកមិនសប្បាយចិត្តទេបើថ្នាក់លើរបស់អ្នកបន្ទោស ឬធ្វើឲ្យអ្នកអាម៉ាស់នៅកណ្តាលចំណោម តែព្រោះគ្មានលទ្ធភាពតបត ទើបអ្នកព្រមបណ្តោយតាមចិត្តគាត់។
ពេលនោះអ្នកពិតជាអន់ចិត្តខ្លាំងណាស់ ខឹងខ្លាំងណាស់ តូចចិត្តខ្លាំងណាស់ តែនៅពេលដែលថ្នាក់លើដឹងពីការពិត ឬរំងាប់កំហឹងរបស់គាត់បាន គាត់ត្រឡប់មកជាយល់ចិត្តអ្នកវិញ ឬគ្រាន់តែធ្វើធម្មតា បើគាត់ល្អខ្លាំងបន្តិចគាត់ក៏អាចសុំទោសអ្នកវិញ។ ពេលនោះអ្នកដូចជាមានកម្លាំងចិត្តខ្លាំងណាស់ ហើយក៏រីករាយនឹងបំពេញការងារបន្ត។

អ្នកព្រមរៀនស្គាល់និងទទួលយកពីចរិតនិស្ស័យរបស់ថ្នាក់លើ និងមិត្តរួមការងារ ទាំងល្អ ទាំងអាក្រក់ អ្នកព្រមដាក់ចិត្តសិក្សាពីគ្នាទៅវិញទៅមក ក៏ព្រោះតែដើម្បីឲ្យការងារបានរលូនទៅយ៉ាងល្អ។ 

ត្រឡប់មកគិតពីទំនាក់ទំនងស្នេហាវិញ គាត់អាចជាសង្សារ ឬស្វាមីភរិយា
សុខៗគាត់ក៏ទៅជាគ្មានហេតុផល ប៉ុន្មានដងហើយដែលគាត់ធ្វើបែបនេះ? 
គាត់តែងតែធ្វើឲ្យអ្នកអាម៉ាស់ គាត់តែងតែទាមទារឲ្យអ្នកចាញ់។
វាពិបាកណាស់ដែលត្រូវទ្រាំរស់នៅជាមួយមនុស្សបែបនេះ កាលពីចាប់ផ្តើមស្រលាញ់គ្នាដំបូងអ្នកមិនបានដឹងទេថាគាត់ជាមនុស្សបែបនេះ 
ពេលនេះដឹងហើយ អ្នកទ្រាំបន្តជាមួយគាត់មិនបានទៀតទេ
អ្នកត្រូវការដើរចេញពីទំនាក់ទំនងមួយនេះ

ព្រោះគាត់មិនមែនជាថ្នាក់លើ មិនមែនជាមិត្តរួមការងារ មិនមែនជាទីដែលផ្តល់មុខមាត់ក្នុងសង្គមឲ្យអ្នកដូចជាក្រុមហ៊ុនដែលផ្តល់តំណែងការងារល្អឲ្យអ្នកបាន
នេះហើយជាហេតុផលដែលអ្នកមិនគួរនឹងព្រមរៀនស្គាល់ និងទទួលយក ចរឹតនិស្ស័យល្អនិងអាក្រក់រវាងគ្នានិងគ្នាបាន 

ទំនាក់ទំនងបេះដូងដែលល្អរលូន មិនល្អស្មើនឹងការងារដែលល្អរលូន
ទើបអ្នកមិនព្រមផ្តល់ការលះបង់ចំពោះគ្នា

បែបនេះមែនទេ?
បើមិនមែនបែបនេះទេ ចូរគិតម្តងទៀតមុននឹងចង់ធ្វើការឈ្នះ និងចាញ់ជាមួយដៃគូស្នេហារបស់អ្នក

ជូនពរអ្នកមានស្នេហាចេះយល់ចិត្តគ្នាឲ្យបានច្រើន រកវិធីរស់នៅជាមួយគ្នាឲ្យបានល្អ។

#អត្ថបទអ្នកនិពន្ធរតនា

បញ្ហា! និយាយតែ២ម៉ាត់តែធ្វើឲ្យមនុស្សដែលកំពុងជួបវាអួលដើមក។

បញ្ហា! ហេតុអ្វីបានជាអ្នកមានឥទ្ធិពលខ្លាំងម្ល៉េះមកលើផ្លូវអារម្មណ៍របស់ខ្ញុំ? 

បញ្ហា វាដូចជាអ្វីមួយធ្វើឲ្យខ្ញុំខ្លបខ្លាចខ្លាំងណាស់។ មិនចង់នឹកដល់ តែវាមករកគ្រប់វិនាទី ដកដង្ហើមក៏ឃើញបញ្ហា។

រាល់ពេលដកដង្ហើមគឺជាពេលវេលាដែលភ័យខ្លាច បារម្ភ និងឈឺផ្សារបំផុត…

មួយជីវិតនេះ ហត់ពេកហើយ..
មួយជីវិតនេះ មិនធ្លាប់ជួបបែបនេះទេ…
ហេតុអ្វីបញ្ហាធ្លាក់មកលើខ្ញុំ?
ហេតុអ្វីបញ្ហាធ្លាក់មកផ្ទួនៗ?

ប្រៀបដូចជាភ្នំសង្កត់ ដូចជាស្រមោលខ្មៅពាំងផ្លូវ ដូចជាយមរាជឈរសម្លុត 
ភ័យណាស់ ខ្លាចណាស់ ពិបាកណាស់ ហត់ណាស់ 
ក្រោកឈរលែងរួចហើយ ព្រមដួល ឲ្យវាទៅតាមដំណើរ….

ដូចជាមេឃខ្មៅងងឹត ហើយក៏ធ្លាក់ភ្លៀងយ៉ាងខ្លាំងមនុស្សដែលកំពុងធ្វើដំណើរតាមផ្លូវត្រូវតែព្រមទទួលតំណក់ទឹកភ្លៀង 

ព្រោះតែខ្ញុំចេះប្រុងប្រយ័ត្ន ខ្ញុំតែងមានអាវភ្លៀងទទូល 
បញ្ហាវាធ្លាក់មកហើយ អាវភ្លៀងរបស់ខ្ញុំវាជួយឲ្យខ្ញុំមិនទទឹកច្រើន តែអាកាសធាតុសើមនឹងធ្វើឲ្យខ្ញុំផ្តាសាយ

ភ្លៀងខ្លាំងយ៉ាងណា តែធ្លាក់អស់ចិត្តក៏គង់រាំងទៅបាត់
ខ្ញុំស្មានតែបានធូរហើយ តែខ្ញុំត្រូវប្រឈមនឹងការស្ទះលូលិចផ្លូវ ចរាចរណ៍ចង្អៀតទៅមុខមិនរួច ហេតុអ្វីក៏បញ្ហាទាំងនេះវាធ្លាក់មកលើខ្ញុំផ្ទួនៗ?
ធុញទ្រាន់ខ្លាំងណាស់ ហត់ណាស់! ខ្ញុំមិនចង់ទៅមុខទៀតសោះ

ក្រឡេករកកន្លែងឈប់ ខ្ញុំភ្ញាក់ព្រឺត! 
ស្មានតែខ្ញុំម្នាក់ឯងទេ ដែលកំពុងជួបបញ្ហាទាំងនេះ តាមពិតមានមនុស្សច្រើនណាស់ដែលកំពុងមានបញ្ហាដូចខ្ញុំ។ 

ខ្ញុំឃើញពូម្នាក់បើកម៉ូតូដឹកមនុស្សស្រីកំពុងឱបទារក 
ឱ ជីវិត! ផ្លូវស្ទះ លិចទឹកពិបាកយ៉ាងនេះ គាត់នៅខំអូសម៉ូតូដែលមានមនុស្សពីរនាក់នៅពីក្រោយ 
មើលចុះនារីម្នាក់នោះប្រហែលជាកូនខ្ចីផង មិនគួរអីត្រូវមកហាលភ្លៀងបែបនេះ 
ខ្ញុំកាន់តែខ្លោចចិត្តអាណិត ទារកតូចម្តេចមិនកើតនៅក្នុងគ្រួសារដែលមានឡាន តូចប៉ុណ្ណេះសោះមកត្រូវលំបាកជាមួយចរាចរណ៍នឹងគេដែរ 

ក្រឡេកទៅខាងនោះ ស្រ្តីមានផ្ទៃពោះកំពុងខំបើកម៉ូតូទៅមុខដោយទទឹកខ្លួនជោគ មិនដឹងថារងាប៉ុនណា បើផ្លូវរអិលពេក បើធ្លាក់ជង្ហុក ចុះកូនក្នុងផ្ទៃនឹងទៅជាយ៉ាងណា?

មើលចុះអ៊ុំម្នាក់នោះចាស់ហើយ ម៉ូតូក៏ចាស់បានជារលត់
លុយទឹកដើតែខ្លួនមួយមិនចង់ទៅមុខផង គាត់នៅស៊ូអូសម៉ូតូចាស់របស់គាត់ទៀត

ហេតុអីក៏ម្នាក់ៗពិបាកខ្លាំងអីយ៉ាងនេះ? 
ខ្ញុំនៅលើម៉ូតូដែលអាចមួរទៅមុខបានតិចៗនេះ មានមុខអីមករអ៊ូទៀត?

ខ្ញុំជានរណា ទើបអាចរស់ដោយមិនមានបញ្ហានោះ? 
ជាមនុស្ស គ្មាននរណាគេចពីបញ្ហាបានទេ 

អរគុណបញ្ហា ដែលមកពេលនេះ ពេលដែលខ្ញុំមានអាវភ្លៀងពេលដែលខ្ញុំគ្មានផ្ទៃពោះ គ្មានកូនតូច គ្មានសម្ពាយដូចពួកគាត់ ..
អរគុណបញ្ហាដែលឆាប់មករកខ្ញុំ 
អរគុណដែលមកដាស់តឿនឲ្យខ្ញុំភ្ញាក់រឭក ឆាប់ទៅមុខឲ្យបានលឿនជាងនេះ ហើយកាន់តែមានការប្រុងប្រយ័ត្ន

ខ្ញុំមិនចង់ធ្វើជាមនុស្សចាស់ដែលអូសម៉ូតូចាស់ពេលភ្លៀង
ខ្ញុំមិនចង់ធ្វើជាស្ត្រីមានផ្ទៃពោះហើយត្រូវបើកម៉ូតូកាត់ភ្លៀង
ខ្ញុំមិនចង់ជួបភាពលំបាកនេះ នៅពេលដែលខ្ញុំមានស្ថានភាពដូចពួកគាត់ឡើយ កាន់តែមិនចង់ឲ្យអនាគតកូនរបស់ខ្ញុំដូចជាទារកដែលខ្ញុំឃើញនេះទេ។

ជឿហើយថាបញ្ហាមិនលើកលែងសភាពលំបាករបស់អ្នកណាឡើយ បើមិនត្រៀមខ្លួនទទួលបញ្ហានិងរកវិធីដោះស្រាយ ឬមិនរឹងមាំក្នុងការប្រឈមនឹងបញ្ហា យើងនឹងមិនអាចឃើញភាពស្រស់ស្អាតទេ។

មើលចុះ ក្រោយភ្លៀងមេឃស្រឡះ ឥន្ទធនូក៏ស្អាតដែរ
នៅពេលដែលចេញផុតផ្លូវស្ទះ ខ្ញុំពិតជាស្រឡះខ្លួនហើយស្រួលដកដង្ហើមណាស់ 😁

ពេលនេះត្រូវអរគុណខ្លួនឯងដែលមិនឈប់កាលពីផ្លូវស្ទះខ្លាំង
ពេលនេះបានជួបភាពធូរស្រាលហើយ អាចសើចដោយមានសេចក្តីសុខបានហើយ ហើយក៏ទទួលបានបទពិសោធន៍មួយដែរ 😄
ជីវិតគឺវាបែបនេះ ❤️

#អត្ថបទអ្នកនិពន្ធរតនា

អារម្មណ៍ដែលបានសើចគឺវាធូរស្រាលណាស់ វាស្រស់ស្រាយណាស់
ចុះធ្វើម៉េចទើបដឹងថាវាធូរស្រាល? ធ្វើម៉េចទើបដឹងថាវាស្រស់ស្រាយ?

ពីព្រោះមុនបានសើច មិនដឹងថាត្រូវយំប៉ុន្មានដង តឹងណែនក្នុងទ្រូងនេះយូរប៉ុនណាហើយ
ចុះបើដឹងហើយថាបន្ទាប់ពីយំ បន្ទាប់ពីតឹងណែនចុកអួលដើមទ្រូងនេះទើបអ្វីៗបានប្រសើរឡើង
ហេតុអ្វីមិនរឹងមាំ? ពេលដែលកំពុងពិបាកត្រូវប្រាប់ខ្លួនឯងថា នឿយមុនស្រណុកក្រោយ កាន់តែនឿយពេលនេះ អនាគតនឹងកាន់តែស្រណុក។
សង្កត់ចិត្តស្រាល កុំចុះចាញ់បើពិតជាចង់ស្រណុកមែន ទ្រាំនឿយបន្តិចទៅ។

ធ្វើការមួយខែ តើត្រូវទទួលសម្ពាធប៉ុន្មានថ្ងៃ? លទ្ធផលចុងក្រោយគឺបានទទួលប្រាក់ខែតែមួយថ្ងៃតែប៉ុណ្ណោះ
សន្សំសំចៃប៉ុន្មានខែឆ្នាំ ទើបអាចទិញបានរបស់ដែលអ្នកប្រាថ្នា កុំគិតពីរបស់តូចតាច គិតដល់ ឡានថ្លៃ ឬផ្ទះធំ។

ព្រោះតែអ្នកមើលឃើញគោលដៅបន្ទាប់ពីការសន្សំ ទើបអ្នកព្រមរិះថាំដើម្បីទុកលុយទាំងនោះ។
ព្រោះតែអ្នកមើលឃើញមួយថ្ងៃដែលបានប្រាក់ខែ ទើបអ្នកព្រមទទួលសម្ពាធជារៀងរាល់ថ្ងៃ។

ដូច្នេះដើម្បីអារម្មណ៍សុខសប្បាយ នៅពេលដែលជីវិតទៅដល់គោលដៅ គប្បីរីករាយនឹងទឹកភ្នែកខ្លួនឯងដែលហូរនៅពេលនេះ។ 
ត្រូវដឹងខ្លួនថាព្រោះអ្នកកំពុងដើរទៅរកគោលដៅហើយទើបពេលនេះអ្នកកំពុងយំ បើពេលនេះអ្នកសើចប្រហែលអ្នកកំពុងតែដើរខុសគោលដៅទេ។

ត្រូវអរគុណទឹកភ្នែកដែរហូរ ព្រោះនេះជាសញ្ញាថាអ្នកជិតបានធូរស្រាលហើយ។
ទឹកភ្នែកដែលហូរមកគឺជាក្តីសង្ឃឹម ត្រូវញញឹមទទួលវាហើយរឹងមាំដើរបន្តទៀត។

#អត្ថបទអ្នកនិពន្ធរតនា

“កើតជាមនុស្ស ម្នាក់ណាមិនធ្លាប់ខុស? “
អ្នកណាក៏និយាយតែពាក្យនេះ តែការពិតជាក់ស្តែងម្នាក់ៗតែងតែរើសអើងនឹងអ្នកដែលសាងកំហុស។

មនុស្សដែលធ្វើខុស សមហើយដែលទទួលពិន័យ តែការសោកស្តាយពីកំហុសគឺជាការពិន័យមួយយ៉ាងធ្ងន់ធ្ងរទៅហើយ 
កំហុសខ្លះធ្វើឲ្យមនុស្សដែលបានសាងមកមានវិប្បដិសារីស្ទើរតែសម្លាប់ខ្លួន អ្នកខ្លះក៏អាចសម្លាប់ខ្លួនមែន។
អ្នកដែលធ្លាប់រើសអើងក៏បានត្រឹមតែសោកស្តាយដែលបាត់បង់មនុស្សធ្លាប់ស្គាល់ ធ្លាប់ស្រលាញ់។

ការមិនរើសអើង ការលើកទឹកចិត្តមិនមែនជាការគាំទ្រឲ្យមនុស្សសាងកំហុសនោះទេ
តែវាជាការសម្តែងពីការយល់ចិត្ត នឹងផ្តល់កម្លាំងចិត្តដល់មនុស្សដែលមនុស្សធ្វើខុសហើយឲ្យខំដើរទៅមុខបន្ត

ទឹកខ្មៅដែលស្រក់លើស្បៃស តើត្រូវតែបោះស្បៃនោះចោល ឬកាត់ម្តុំដែលប្រលាក់ទឹកខ្មៅនោះមែនទេ? 

ស្បែសក្បុសមើលទៅដូចជាបរិសុទ្ធណាស់
បើស្បៃសមានលាយពណ៌ឥន្ទធនូតើស្អាតទេ? ចុះបើចាក់ឲ្យចេញរូបផ្កាតើនឹងស្អាតទេ?

កំហុសដែលសាងមកហើយ គ្មាននរណាអាចត្រឡប់ក្រោយ ដើម្បីចៀសមិនធ្វើឲ្យវាកើតមកបាននោះទេ។
បើវាជ្រុលជាមានកំហុសទៅហើយ ម៉េចមិន ប្រើកំហុសបង្កើតថាមពលមួយដើម្បីប្តូរខ្លួនឯងឲ្យក្លាយជាមនុស្សថ្មីវិញ?

កុំស្តាយស្បៃស គួរតែខំរកពណ៌មកចាក់បន្ថែមដើម្បីឲ្យស្បៃកាន់តែស្អាត។

#អត្ថបទអ្នកនិពន្ធរតនា

ថ្ងៃនេះអ្នកហត់ណាស់ហើយ
ទឹកភ្នែកហូរមកច្រើនណាស់មែនទេ?
បេះដូងមិនទាន់បាត់ពើតផ្សាទេមែនទេ?
នៅតែមានអារម្មណ៍ដូចភ្នំសង្កត់លើបេះដូងដ៏តូចមួយរបស់អ្នក តើមែនទេ?

បើចិត្តនេះហត់ពេញមួយថ្ងៃហើយ យប់នេះត្រូវឆាប់ចូលគេង
ទោះភ្នែកមិនព្រមបិទ ក៏ត្រូវតែបង្ខំចិត្តគេងឲ្យលក់
ភាពងងឹតមិនអាចឲ្យអ្នកមើលឃើញភាពស្រស់ស្អាតនោះទេ

ចូលគេងឲ្យឆាប់បានលក់ ហើយត្រូវឆាប់ភ្ញាក់មកវិញ
អ្នកត្រូវភ្ញាក់ពីព្រលឹមហើយចេញឲ្យផុតពីបន្ទប់គេង 

ដឹងទេ? ទេសភាពពេលព្រឹកព្រលឹមស្រស់ស្អាតណាស់
ពន្លឺទើបអាចឲ្យអ្នកមើលឃើញពិភពលោកដ៏ស្រស់ស្អាតនេះ

បើចង់ឲ្យចិត្តឆាប់ជាត្រូវធ្វើដំណើរទៅទិសខាងកើត
អ្នកត្រូវទៅតាមពន្លឺមួយនោះ ពន្លឺពណ៌មាសដែលជះមកលើរាងកាយខ្សោះកក្រោះរបស់អ្នក
កម្តៅដែលដុតទុក្ខសោកទាំងពួង គឺមានតែនៅពេលព្រឹកព្រលឹមទេ 

នៅពេលដែលព្រះអាទិត្យចាប់ផ្តើមរះ
ពេលនោះហើយដែលជួយឲ្យអ្នកបានស្រាកស្រាន្តពីភាពឈឺចាប់បានខ្លះ
ព្រះអាទិត្យថ្មីដែលអ្នកបានឃើញគឺជាទំព័រថ្មីនៃជីវិតរបស់អ្នក

ថ្ងៃស្អែកតែម្តងប្រហែលមិនអាចជួយឲ្យចិត្តអ្នកបានជាភ្លាមៗនោះទេ
តែស្អែកច្រើនដងនឹងធ្វើឲ្យអ្នករឹងមាំដោយមិនដឹងខ្លួន
មិនបាច់ជឿខ្ញុំទេ គ្រាន់តែសាកល្បងធ្វើបែបនេះរាល់ថ្ងៃ
ថ្ងៃមួយអ្នកនឹងទទួលបានអារម្មណ៍មួយនេះ។

ជូនពរអ្នកដែលកំពុងឈឺចាប់ទាំងឡាយបានដើរផុតពីក្តីទុក្ខសោកឆាប់ៗ

#អត្ថបទអ្នកនិពន្ធរតនា